Կառավարությունը 234 միլիոն 638 հազար դրամ գումար կտրամադրի «Երկրապահ կամավորականների միության»-ը։ Ինչպես տեղեկացնում է «Արմենպրես»-ը, համապատասխան որոշումն ընդունվել է հունիսի 9-ի ՀՀ կառավարության նիստի ժամանակ։
Նշվում է, որ 2020 թվականի 44-օրյա պատերազմի ընթացքում «Երկրապահ կամավորականների միություն» ՀԿ-ն ունեցել է նշանակալի մասնակցություն` ունենալով կազմակերպության անդամների մեծ թվով մարդկային կորուստներ: Հետպատերազմյան շրջանում ավելի քան 2000 ԵԿՄ կամավորականներ ՊՆ-ի կազմում մարտական հերթապահություն են իրականացնել տարբեր մարտական դիրքերում:
«Հաշվի առնելով, որ «Երկրապահ կամավորականների միություն» ՀԿ-ն համագործակցում է ՀՀ պաշտպանության նախարարության հետ, օժանդակում է նրա առջև դրված խնդիրների կատարմանը, ՀՀ զինված ուժերի համար դաստիարակում և պատրաստում է ապագա զինվորներ, նախագծի ընդունմամբ հնարավորություն կստեղծվի ապահովել ՀԿ-ի 2022թ-ի գործունեության իրականացումը ողջ ծավալով»,- նշված է նախագծում
Որոշման նախագծով առաջարկվել է ՀՀ պետական բյուջեի եկամուտների և ծախսերի 234 միլիոն 638 հազար դրամ ավելացման հաշվին հատկացումներն ուղղել պաշտպանության նախարարության կողմից իրականացվող «1169. ՀՀ պաշտպանության ապահովում» ծրագրի շրջանակներում «Երկրապահ կամավորականների միություն» ՀԿ-ին եռամսյակային կտրվածքով դրամաշնորհ տրամադրելու ծախսերի ֆինանսավորմանը` չկիրառելով Հայաստանի Հանրապետության կառավարության 2003 թվականի դեկտեմբերի 24-ի N 1937-Ն որոշմամբ հաստատված կարգի պայմանները:
