ՀՀ ազգային ժողովի «Իմ քայլը»-ից դուրս եկած պատգամավորները դժգոհեցին ԱԺ նախորդ նիստում կառավարության հետ հարց ու պատասխանին կառավարության վերաբերմունքից՝ այն առնչությամբ, որ գործադիրն առաջարկեց պատգամավորների հնչեցրած հարցերը ձևակերպել գրավոր և ուղարկել: «Արմենպրես»-ի հաղորդմամբ՝ ԱԺ մարտի 25-ի նիստում Թագուհի Թովմասյանն ամբիոնից, դիմելով ԱԺ նախագահին, մասնավորապես ասաց. «Որպես խորհրդարանի նախագահ առնվազն երեկ պետք է միջամտեիք, որ մեր երեք անկախ պատգամավորների հարցերին քմահաճ ձևով կառավարությունը չպատասխանեց: Ես կարծում եմ, որ մենք այնպիսի հարցեր էինք բարձրաձայնել, որոնց պատասխանները կառավարությունը հաստատ ուներ: Եվ սա դիտարկվում է դիտավորյալ քմահաճ վերաբերմունք՝ ուղղված «Իմ քայլը»-ից դուրս եկած պատգամավորներին»:
Նա հորդորեց ԱԺ նախագահին ավելի ուշադիր լինել բոլոր պատգամավորների նկատմամբ՝ շեշտելով, որ ԱԺ նախագահը բոլոր պատգամավորներին է ներկայացնում, և օրենքը պարտադրում է նիստը վարել արդարության դիրքերից: Պատգամավորը նշեց՝ շատ կցանկանար, որ իր հարցի առնչությամբ՝ Հրանտ Մաթևոսյանի թանգարանի մասին կապված հարցը, բացահայտվեր հրապարակավ: «Շուրջ երկու տարի և դեռ ավելի, գրագրություն է ընթանում պետական գերատեսչությունների և թանգարանի տնօրենի՝ Հրանտ Մաթևոսյանի որդու միջև»,-ասաց նա ու հավելեց, որ կառավարությունը չպատասխանելով ոչինչ չի շահում:
Թովմասյանը հիշեցրեց, որ կառավարությունը պարտավոր է պատասխանել պատգամավորների հարցերին:
ԱԺ նախագահ Արարատ Միրզոյանը ճշգրտում արեց. «Անկախ պատգամավոր չկա, կան խմբակցությունում չընդգրկված պատգամավորներ, սա որքան ֆորմալ, նույնքան էլ խորիմաստ ձևակերպում է»:
Այս առնչությամբ դժգոհություն հայտնեց նաև «Իմ քայլը»-ից դուրս եկած Գոռ Գևորգյանը:
