ՀՀ ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը պնդում է, որ միայն վարչապետի պաշտոնակատարի ստորագրությամբ սահմանազատման վերաբերյալ նոր փաստաթուղթը չի կարող ուժի մեջ մտնել, խորհրդարանն այն պետք է վավերացնի:
«Արմենպրես»–ի հաղորդմամբ՝ Մարուքյանն այս մասին ասաց ԱԺ արտահերթ նիստում «2021 թվականի մայիսի 12-ից Հայաստանի Հանրապետության տարածքային ամբողջականության խախտման, Հայաստանի Հանրապետության նկատմամբ ուժի կիրառման արդյունքում առաջացած իրավիճակում Հայաստանի Հանրապետության կառավարության կողմից իրականացվող գործողությունների մասին» Ազգային ժողովի հայտարարության նախագծի ներկայացմանը:
Ըստ նրա՝ որևէ միջազգային պայմանագիր առանց խորհրդարանի վավերացման չի կարող իրավական ուժ ունենալ: Հայտարարության տեքստն ընթերցելիս Մարուքյանը, մասնավորապես, ասաց.
«Այսպիսով՝ Հայաստանի Հանրապետության վարչապետի ժամանակավոր պաշտոնակատարը չի կարող իր ստորագրությամբ ուժի մեջ դնել մի փաստաթուղթ, որը կարող է ուժի մեջ մտնել բացառապես խորհրդարանի վավերացման կամ հանրաքվեի արդյունքում»:
ԼՀԿ ղեկավարը նկատեց, որ նոյեմբերի 10-ից հետո բոլորը ծանր ապրումներ են ունեցել և շարունակում են ունենալ, և տրամադրությունները բնավ նախընտրական չեն:
«Այս իրավիճակում ինչու՞ ՀՀ վարչապետի պաշտոնակատարը բանակցում է մի փաստաթուղթ, որի մասին իմանում ենք ոչ պաշտոնական տեղեկատվական աղբյուրներից:
Եթե բանակցվում է, և երկու կողմն էլ փաստաթղթի հետ պրոբլեմ չունեն, վարչապետի պաշտոնակատարը պնդում է, որ դա 100 տոկոսով համապատասխանում ՀՀ ազգային շահերին, ինչու՞մն է խնդիրը, որ դա չի լուսաբանվում գոնե խորհրդարանական ուժերին»,-ասաց Մարուքյանն ու հետաքրքրվեց, թե ինչու որևէ ֆորմատով՝ փակ, բաց, կիսափակ, որևէ ռեժիմով քննարկում չի լինում:
Նա նկատեց, որ փաստաթղթի վերաբերյալ տեղեկատվությունը սպրդվելուց հետո 2 օր է՝ հայ ժողովուրդը ոչ քուն ունի, ոչ դադար: «Սրա պատասխանն ո՞վ է տալու: Եվ խորհրդարանական ընդդիմությունն իր ձեռքի տակ եղած միակ լծակն օգտագործել, հրավիրել է արտահերթ նիստ և հիմա պետք է մեր ժողովրդին տանք բացատրություններ՝ այս հարցերի վերաբերյալ, որոնք բարձրացրեցի»,-ասաց Մարուքյանը: