ՀՀ նախկին նախագահ Սերժ Սարգսյանի եղբոր՝ Սաշիկ Սարգսյանի որդու՝ Նարեկ Սարգսյանի նկատմամբ միջազգայն հետախուզում է հայտարարվել, ոստիկանությունը համագործակցում է Ինտերպոլի հետ:
Այս մասին լրագրողներին ասել է ՀՀ ոստիկանապետ Վալերի Օսիպյանը՝ իր պաշտոնավարման 100 օրն ամփոփող ասուլիսին:
«Թույլ տվեք չմանրամասնել, բայց ոնց որ թե մեր տեսադաշտում շուտով կլինի»,- ասել է Օսիպյանը:
Օսիպյանը նշել է, որ Նարեկ Սարգսյանը Հայաստանից հեռացել է հետախուզում հայտարարելուց 1-2 օր առաջ:
31-ամյա Նարեկ Սարգսյանը որպես մեղադրյալ ներգրավվել է 2018թ.հուլիսի սկզբին:
Ըստ ԱԱԾ տարածած հաղորդագրության՝ Նարեկ Սարգսյանին պատկանող բնակարանի խուզարկությամբ հայտնաբերվել են խոշոր չափի թմրանյութեր, ինչպես նաև զենք-զինամթերք:
Բացի այդ՝ ԱԱԾ քրեական գործի շրջանակներում հուլիսի 4-ին խուզարկություն է կատարվել Նարեկ Սարգսյանի հաշվառման վայրում, որտեղից հայտնաբերվել է Մարտիրոս Սարյանի շուրջ 280 000 ԱՄՆ դոլար արժողությամբ թվով 14 գծանկար. ըստ ԱԱԾ-ի՝ Նարեկը չարաշահելով նկարչի ժառանգներից մեկի վստահությունը, նրանից այդ գծանկարները վերցրել էր՝ խոստանալով դրանց դիմաց վճարել 28 հազար ԱՄՆ դոլար, իսկ մնացած գումարով համատեղ հիմնադրել խաղատուն և հովանավորել դրա գործունեությունը: Սակայն Նարեկը խոստումը չի կատարել և հրաժարվել է վերադարձնել նկարները:
Նարեկ Սարգսյանը որպես մեղադրյալ ներգրավվել է նաև մեկ այլ դրվագով՝ մարդ առևանգելու և ծեծի ենթարկելու դեպքի առթիվ հարուցված քրեական գործի շրջանակում:
