Օգոստոսի 27-ին Երևանի Գումի շուկա անակնկալ այցելելուց և գյուղմթերքի գներին ծանոթանալուց, ապա ոլորտի պատասխանատուների հետ զրուցելուց հետո վարչապետ Նիկոլ Փաշինյանը որոշել է այցելել Շենգավիթ համայնք (Երրորդ մաս) և շրջել շուկայում ու բանջարեղենի խանութներով:
Իր այցի մասին նախապես տեղեկացնելով ֆեյսբուքյան ուղիղ եթերով՝ Փաշինյանը բացատրել է, որ պատասխանատուներն իրեն տեղեկացրել են՝ Գումի շուկայում գները կարող են ավելի բարձր լինել:
Այստեղ Փաշինյանը պարզել է, որ Գումի շուկայում իսկապես գներն ավելի բարձր են, քան Շենգավիթում:
Այցելությունից հետո Փաշինյանը պատասխանել է լրագրողների հարցերին:
«Հիմնականում համոզվեցի, որ օրինակ, պոմիդորի, վարունգի, սմբուկի ու այս սեզոնի մի շարք կարեւոր բանջարեղենների գները, իսկապես, տարօրինակ բարձր են, եւ, ընդհանրապես, տարօրինակ է, որ այս սեզոնին ջերմոցային լոլիկ եւ վարունգ է հայտնվել շուկայում, որովհետեւ Հայաստանի համար մի քիչ անսովոր է: Այս սեզոնին պետք է, որ դաշտի բանջարեղեն լինի», – ասել է Փաշինյանը:
Անդրադառնալով ոռոգման խնդրին, վարչապետը նշել է, որ խնդիր կա, բայց պետք հասկանալ խնդիրը՝ ջուր չկա՞, թե կա, բայց վատ է օգտագործվում և ոմանք չարաշահումներ են անում. «Ես պնդում չեմ անում, ես ասում եմ, որ այդպիսի խնդիրներ կան. քանի դեռ հիմնավոր բան չկա, չեմ կարող պնդել»:
Փաշինյանը նաև տեղեկացրել է, որ այցելությունից հետո գնալու է ԿԲ նախագահի հետ հանդիպման՝ գնաճի թեման նաեւ քննարկելու:
