Պաշտոնական Բաքուն արձագանքել է Հայաստանի՝ ՄԱԿ-ի Արդարադատության միջազգային դատարան՝ ընդդեմ Ադրբեջանի՝ Խտականության բոլոր ձևերի վերացման միջազգային կոնվենցիայի խախտման հիմքով գանգատին։
Նախօրեին երեկոյան այս լուրի տարածումից հետո, Ադրբեջանի ԱԳՆ-ն բավական նյարդային արձագանքեց և չսպասելով լուսաբացին՝ դեռ գիշերը տարածեց հաղորդագրություն։
Նախ թվիթերյան իր գրառմամբ ԱԳ փոխնախարար Էլնուր Մամեդովը տեղեկացրեց, որ առաջիկա օրերին Ադրբեջանը Հայաստանի դեմ հայց կներկայացնի նույն հիմքով։
Հետո էլ տարածվեց ԱԳՆ մամուլի ծառայության ղեկավար Լեյլա Աբդուլլաևայի հայտարարությունը։ Նա ևս ասել է, որ Ադրբեջանը կդիմի դատարան, որպեսզի «Հայաստանը պատասխանատվության ենթարկվի Խտականության բոլոր ձևերի վերացման միջազգային կոնվենցիայի համակարգային խախտումների համար»։
«Ուզում եմ նշել, որ Հայաստանի կողմից «մեր տարածքի անօրինական օկուպացիայի ավարտից հետո, մանրամասն հավաքվել ու փաստաթղթավորվել են ադրբեջանցների նկատմամբ մարդու իրավունքների խախտումները։ Այստեղ մտնում են բռնի տեղահանման, դաժան վերաբերմունքի, խոշտանգումների, ադրբեջանցիների՝ էթնիկ պատկանելիության հողի վրա սպանությունների դեպքերը։ Ավելի քան 1 մլն ադրբեջանցի բռնությամբ վտարվել է իր տներից «հայկական ագրեսիայի հետևանքով»,- ասել է Աբդուլլաևան`նշելով, որ եռակողմ հայտարարության ընդունումից հետո էլ, իբր, շարունակում է խախտել կոնվենցիան՝ խոչընդոտելով ադրբեջանցի տեղահանվածների վերադարձին ականապատման ու ականապատ դաշտերի քարտեզների տրամադրումից հրաժարվելու միջոցով։
Հավելենք, որ Միջազգային դատարան ներկայացրած իր գանգատում ՀՀ-ն նշում է, որ «տասնամյակներ շարունակ Ադրբեջանը հայերին ռասայական խտրականության է ենթարկել, զանգվածային սպանությունների, խոշտանգումների և այլ բռնությունների», և որ դա «պետության կողմից հայատյացության քաղաքականության հետևանք է»:
Հայաստանը պնդում է, որ «այս գործելակերպը մեկ անգամ ևս առաջին պլան է մղվել 2020 թվականի սեպտեմբերին ՝ Արցախի Հանրապետության և Հայաստանի դեմ Ադրբեջանի ագրեսիայից հետո», և որ «այդ զինված հակամարտության ընթացքում Ադրբեջանը թույլ է տվել CERD- ի կոպիտ խախտումներ»:
Պաշտոնական Երևանն իր հայցում ընդգծում է, որ նույնիսկ ռազմական գործողությունների ավարտից և 2020 թվականի նոյեմբերի 10-ին հրադադարի ուժի մեջ մտնելուց հետո Ադրբեջանը շարունակել է հայ գերիների, պատանդների և ձերբակալված այլ անձանց սպանությունները, խոշտանգումներն ու մյուս նվաստացումները:
Աղբյուր՝ Factor.am
