Այսօր կառավարության նիստում երբ Առողջապահության նախարար Անահիտ Ավանեսյանը դժգոհում էր Հայաստանում պատվաստումային գործընթացի լայն հակաքարոզչությունից, ինչի հետևանքով պատվաստումների տեմպը ցածր է, նիստը վարող ՀՀ վարչապետ Նիկոլ Փաշինյանը վրդովվեց:
Նախ նա հայտարարեց, որ պատվաստման գործընթացի դեմ պայքարողները քաղաքական շահարկումներ են անում. «Այդ մարդկանց պետք է, որ կորոնավիրուսից շատ մարդ մահանա, որպեսզի հայտարարեն, թե կառավարությունը չի կարողանում պայքարել վարակի դեմ»:
Այդ դեպքում, ըստ Փաշինյանի, կառավարությունը չպետք է ընկնի նրանց հետևից, քանի որ ունի հստակ պարտավորություն:
«Ինչու եք բողոքում, որ նման բաներ են անում, կա հստակ պետության պարտավորություն, վարչական լծակները գործադրեք…Պետք է պատվաստումը գնա առաջ, և կներեք, ես առողջապահության նախարարությունից չեմ ուզում լսել բողոք, որ խաբգարում են պատվաստման գործընթացներին, պետությունը ունի անհրաժեշտ լծակները, ընդունել է անհրաժեշտ իրավական ակտեր և գնալ իրականացնել պատվաստման գործընթացը: Մենք ինչո՞ւ ենք կենտրոնանում, թե ինչ են ասում: Մարգինալ ուժեր են, ինչ ուզում են, թող ասեն: Մենք նոր ենք ընտրություն ունեցել, և կառավարությունը մանդատ է ստացել իր ծրագրերն իրականացնելու: Մենք ամեն անգամ կառավարության նիստում պետք է ասենք չորս հոգի կամ հարյուր հոգի ինչ-որ բան են ասո՞ւմ: Ես ձեր առաջ խնդիր եմ դրել, ինձ մի ասեք՝ ով է խանգարում, գնացեք լուծեք: Վատ են, շատ վատ են պատվաստման թվերը, գնացեք լուծեք հարցը ու ոչ մի բանից չբողոքեք: Պետական կառավարման համակարգում մարդ չպետք է լինի, որ պատվաստված չլինի», դիմելով առողջապահության նախարարին հայտարարեց Փաշինյանը::
