Վարչապետ Նիկոլ Փաշինյանը հոկտեմբերի 13-ին որոշում է ստորագրել Վահագն Արսենյանին Ջերմուկ համայնքի ղեկավարի ժամանակավոր պաշտոնակատար նշանակելու վերաբերյալ։ Վահագն Արսենյանը հայտնի խոշոր գործարար, Հանրապետական խմբակցության նախկին պատգամավոր Աշոտ Արսենյանի որդին է։
Աշոտ Արսենյանը 2003-2018 թթ. եղել է խորհրդարանի պատգամավոր ՀՀԿ-ից, մինչ այդ էլ Ջերմուկի քաղաքապետն էր, իսկ դրանից էլ առաջ` Ջերմուկի հանքային ջրերի գործարանի տնօրենը։ Աշոտ Արսենյանը ՀՀԿ-ն լքեց հեղափոխությունից հետո՝ Ամուլսարի ոսկու հանքավայրի շահագործման շուրջ թեժացած կրքերի ֆոնին, նա հայտարարել էր, որ ՀՀԿ-ական լինելն իրեն խանգարում է Ամուլսարի հարցը քննարկել ազդակիր համայնքի բնակիչների հետ։
Արսենյանը, սակայն, մեծապես հայտնի է ոչ թե որպես պատգամավոր, այլ որպես «Ջերմուկ գրուպի» սեփականատեր։ «Ջերմուկ գրուպին» է պատկանում Ջերմուկի հանքային ջրերի գործարանն ու արտադրությունը։ Հանքային ջրի արտադրությունը սկսվել է դեռ 1951 թվականին՝ խորհրդային ժամանակահատվածում։ Ընկերությունը հանքային ջուր է արտահանում նաև դեպի ԱՄՆ, Ռուսաստան, Ուկրաինա, Վրաստան, Եվրամիության երկրներ, Իսրայել։ 1000 հարկ վճարողների 2020-ի ցանկում «Ջերմուկ գրուպը»132-րդ տեղում է՝ վճարած ավելի քան 1.4 միլիարդ դրամ հարկով։ «Ջերմուկ գրուպին» է պատկանում մեկ այլ ջրերի ապրանքանիշ՝ «Բյուրեղը»։
Քրեական գործ՝ ծառայությունից խուսափելու դեպքի առթիվ
Վահագն Արսենյանի հետ կապված 2019 թվականին հայտնի դարձավ, որ Քննչական կոմիտեն քրեական գործ է հարուցել նրա՝ զինծառայությունից ազատվելու դեպքով։ Գործը հարուցվել էր փաստաթղթեր կեղծելու, խաբեության այլ ճանապարհով զինծառայությունից խուսափելու փաստի առթիվ։ Վահագն Արսենյանը զինծառայությունից ազատվել էր առողջական վիճակի հիմքով։ Ամիսներ անց, սակայն, Վահագն Արսենյանի նկատմամբ քրեական հետապնդումը դադարեցվել էր, իսկ գործն էլ կարճվել։ 2019 թ. վերջին Երևանի քաղաքապետարանին ձյուն մաքրող և աղբատար մեքենաներ նվիրած ընկերությունների ցանկում էր նաև «Ջերմուկ գրուպը», որը 2 ձյուն մաքրող մեքենա էր նվիրել քաղաքապետարանին։ Որպես «Ջերմուկ գրուպի» տնօրեն՝ Վահագն Արսենյանին կարելի է տեսնել պաշտոնական հաղորդագրություններում՝ նախկին նախագահ Սերժ Սարգսյանին, վարչապետ Կարեն Կարապետյանին գործարանում հյուրընկալելիս։
Վահագն Արսենյանի ներգրավվածությունը բիզնեսներում
Իրավաբանական անձանց էլեկտրոնային ռեգիստրի տվյալների համաձայն՝ «Ջերմուկ գրուպի» միակ բաժնետերը և տնօրենը համայնքի ղեկավարի նորանշանակ ժամանակավոր պաշտոնակատար Վահագն Արսենյանն է։ Շշալցված հանքային ջրերի ապրանքային շուկայում, ըստ Մրցակցության պաշտպանության հանձնաժողովի, «Ջերմուկ գրուպը» ունի գերիշխող դիրք։
«Ջերմուկ գրուպը» վերջին տարիներին սկսել է նաև կառուցապատման գործունեություն, ու մայրաքաղաքի Արշակունյաց պողոտայում կառուցում է «Նոր Բյուրեղ» բնակելի համալիրը։ Համալիրի կառուցապատողը թեև «Ջերմուկ գրուպն» է, սակայն շինարարական աշխատանքներն իրականացնում է Հատուկ քննչական ծառայության աշխատակազմի նախկին ղեկավար Դավիթ Սուքիասյանին պատկանող «ՄԼ մայնինգ» ընկերությունը, իսկ ճարտարապետական մասն ապահովում է Քաղաքաշինության կոմիտեի նախկին նախագահ Նարեկ Սարգսյանի ճարտարապետական արվեստանոցը։ «Նոր Բյուրեղ» համալիրը բաղկացած է 7 բնակելի շենքերից (որոնցից մեկը 25 հարկանի) ու 2 բիզնես կենտրոններից, նաև ունի 1.2 հեկտար կանաչապատ տարածք։
Ջերմուկի նորանշանակ քաղաքապետի պաշտոնակատարը 30 տոկոս բաժնեմաս ունի նաև «Ռելոդ» ՍՊԸ-ում։ Այս ընկերությունը զբաղվում է տեղեկատվական տեխնոլոգիաների ոլորտում ծառայությունների մատուցմամբ, ծրագրավորմամբ և խորհրդատվությամբ։ Ուշագրավ է, որ ընկերությունում 30 տոկոս բաժնեմաս ունի Գերմանիայում հաշվառված Կիբար Խալվաշին։ Խալվաշին վրացի միլիոնատեր գործարար է, նրան է պատկանում Վրաստանի ամենաբարձր վարկանիշ ունեցող հեռուստաընկերությունը՝ «Ռուսթավի-2»-ը, նաև մի շարք այլ ձեռնարկություններ։ Նա նաև Վրաստանում Pepsi-ի համահիմնադիրն է, Միխեիլ Սահակաշվիլու իշխանության մոլի քննադատներից։ Արսենյանների ու Խալվաշիի բիզնես գործընկերությունը, ըստ էության, սկսվել է հենց տարածաշրջանում Pepsi ներմուծման ու վաճառքի բիզնեսից։
Աշոտ Արսենյանը հանդիսանում էր Հայաստանում հայտնի «Պեպսի» քաղցրահամ, զովացուցիչ ըմպելիքի ներմուծողն ու վաճառողը։ Այս գործունեությունն իրականացվում էր «Ջերմուկ ինթերնեյշնլ Պեպսի-կոլա բոթլեր» ՍՊԸ-ի միջոցով։ Իրավաբանական անձանց էլեկտրոնային ռեգիստրի համաձայն՝ 2006-2017 թվականներին ընկերության բաժնետեր է հանդիսացել Աշոտ Արսենյանի մյուս որդին՝ Արսեն Արսենյանը, որը 2013 թվականին իր բաժնեմասերի 50 տոկոսը վաճառում է Վիրջինյան կղզիներում գրանցված «Հայբրիֆուդ ընդ բեվրիջ լիմիթեդ» ընկերությանը։ Ըստ «Հետք» էլեկտրոնային պարբերականի հրապարակման՝ «Հայբրիֆուդ ընդ բեվրիջ լիմիթեդը» ներառված է Highbury Group ընկերությունների խմբի մեջ ու ղեկավարվում է նախագահ Արմեն Սարգսյանի կողմից։ 2017 թվականին «Ջերմուկ ինթերնեյշնլ Պեպսի-կոլա բոթլեր» ՍՊԸ-ն ամբողջությամբ անցնում է Վիրջինյան կղզիներում գրանցված մեկ այլ ընկերության՝ «Էլսու ինք» ՍՊԸ-ին, որը, ըստ «Հետքի», ևս պատկանում է Սարգսյանների ընտանիքին։
Վահագն Արսենյանը հանդիսանում է նաև «Ջերմուկի մայր գործարան» ՍՊԸ-ի միանձնյա բաժնետերը, այս ընկերությունն ընդգրկված է «Ջերմուկ գրուպի» կազմում։
Ջերմուկի քաղաքապետի ժամանակավոր պաշտոնակատարը նաև «Ջերմ ֆարմ» ՍՊԸ-ի բաժնետերն էր մինչև անցյալ տարի։ «Ջերմ ֆարմը» ձևավորվել էր «Ջերմուկ գրուպից» առանձնացման ճանապարհով, ընկերությունը զբաղվում էր անասնապահությամբ ու բուսաբուծությամբ։ 2020 թվականին ֆերման անցնում է «Հայր և որդի Երեմյաններ» ՍՊԸ-ին, որն իր հերթին պատկանում է ռեստորանային ոլորտի գործարար Դավիթ Երեմյանին։ Բացի այս, 2019 թվականին Երեմյանը Վահագն Արսենյանից գնել է «Էկո ֆարմ» ընկերությունը, որը զբաղվում էր խոշոր եղջերավոր կենդանիների բուծմամբ ու կաթի արտադրությամբ։
«Ջերմուկ գրուպի» կազմում գործում է նաև «Ջերմուկ հիդրոտեխ» ՍՊԸ-ն։ Ընկերությունը շահագործում է Արփա գետի վրա գործող «Ջերմուկ ՀԷԿ-2» փոքր հիդրոէլեկտրակայանը։ ՓՀԷԿ-ի դրվածքային հզորությունը 2,35 մՎտ է, իսկ դերիվացիոն խողովակաշարը՝ 3513 մետր։
Գործարարը քաղաքականությամբ պե՞տք է զբաղվի, թե՞ ոչ
«Ջերմուկ գրուպի» սեփականատեր Վահագն Արսենյանի նշանակումը Ջերմուկի համայնքապետի ժամանակավոր պաշտոնակատարի պաշտոնում ուղիղ հակասության մեջ է Նիկոլ Փաշինյանի՝ բիզնեսը քաղաքականությունից տարանջատելու մասին հայտարարությունների հետ։ 2018 թվականի մայիսի 8-ին խորհրդարանում վարչապետ առաջադրվելու ելույթում Փաշինյանը հայտարարում էր՝ «գործարարը քաղաքականությամբ չպետք է զբաղվի»։
«Գործարարը քաղաքականությամբ չպետք է զբաղվի։ Եվ սա ճիշտ է ու արդարացի։ Բայց այս սկզբունքի կիրառումն ամբողջական ու ազնիվ չի լինի, եթե մենք չկիրառենք այս սկզբունքի կարևոր բովանդակային կողմերից մյուսը. եթե գործարարը քաղաքականությամբ պետք է չզբաղվի, քաղաքական գործիչն էլ բիզնեսով չպետք է զբաղվի և քաղաքականությունը, առավելևս իշխանությունը չպետք է լինեն փող աշխատելու գործիք որևէ մեկի համար, ու հանրությունը պետք է լծակներ ունենա վերահսկելու, որ իր պաշտոնյան բիզնեսով չզբաղվի»,- ասում էր Փաշինյանը։
Նույն տարվա հուլիսի 5-ին Փաշինյանը Սյունիքում հայտարարում էր՝ «տեղական իշխանների, իշխանիկների, ֆեոդալների ժամանակն անցել է»։
