Այսօր խորհրդարանում 2022 թվականի բյուջեի նախագծի քննարկման ժամանակ «Հայաստան» խմբակցությունից Գեղամ Նազարյանը փոխոստիկանապետ Արա Ֆիդանյանին ներկայացրեց վարորդների մտահոգությունը.
«Տեսեք՝ մի շաբաթ է, դպրոցները փակ են և երթևեկությունը քաղաքում կանոնակարգված է, հատկապես դպրոցների մոտ մեքենաների կուտակումներ չկան: Իսկ դասերի օրերին, շատ մամաների համար ժամանց է դառնում, երեխաներին տանել դպրոց ու իրենք գնան 4 ժամ քաղաքում պտտվեն, հետո գան վերցնեն երեխային ու այդպիսով անտանելի դարձնել մեր քաղաքում երթևեկությունը: Կա՞ հնարավորություն գոնե դպրոցների մոտ արգելել մեքենաների կայանումը»:
Ի պատասխան Ֆիդանյանը համաձայնեց, որ դպրոցների դիմաց առանձին ժամերին մեքենաների կուտակումները շատ են և հավելեց, որ քննարկվում է դպրոցների դիմաց կայանելը արգելելու հնարավորությունը:
«Բայց այդ ծրագիրն իրագործելու համար մեզանից երկար ժամանակ է պահանջվելու, քանի որ պետք է խորությամբ վերլուծել, թե որ հատվածներն են հատկապես նման վիճակում, որովհետև կարող է դպրոցների մոտ արգելենք, բայց 100 մետր այն կողմ նման կուտակում առաջանա: Հետևաբար այստեղ ևս էական վերլուծություն է անհրաժեշտ, և վստահ եմ՝ արդյունքների կհասնենք»,- հավելեց Ֆիդանյանը:
Արձագանքելով փոխոստիկանապետին ԱԺ պատգամավոր Անդրանիկ Քոչարյանը հորդորեց տուգանքները խստացնել:
