Լեռնային Ղարաբաղում խաղաղապահ գործողության շրջանակում ռուս զինծառայողները հիմա կենտրոնացած են ռազմագերիների վերադարձի, ենթակառուցվածքային նախագծերի իրականացման և այլ հումանիտար հարցերի լուծման ուղղությամբ։ Այս մասին հայտարարել է ՌԴ Գլխավոր շտաբի պետ Վալերի Գերասիմովը, գրում է ՏԱՍՍ գործակալությունը, գրում է Factor.am-ը։
«Հրադադարի և բոլոր ռազմական գործողությունների վերահսկողությունից զատ՝ մեր խաղաղապահների ջանքերը կենտրոնացած են տարածաշրջանում խաղաղ կյանքի վերականգնման ուղղությամբ, դրա հետ մեկտեղ, հաջողությամբ լուծվում են հումանիտար խնդիրները»,- ասել է Գերասիմովը օտարերկրյա պետությունների ռազմական կցորդների հետ ճեպազրույցում։
Այդ առաջադրանքներից հիմնականը նա անվանել է «տարածքների և օբյեկտների ականազերծումը, պատանդների ու ռազմագերիների վերադարձը, զոհվածների մարմինների որոնումը, հումանիտար բեռների տեղափոխման անվտանգության ապահովումն ու ենթակառուցվածքային նախագծերի իրականացումը»։
«Ռուսական ԶՈՒ-ն շարունակում է Լեռնային Ղարաբաղում խաղաղապահ առաքելությունը։ Լարվածության թուլացման ու հրադադարի ռեժիմի պահպանման համար ռուս խաղաղապահները կազմակերպել են դիտակետերում հերթապահություն ու պարեկություն՝ խաղաղապահ առաքելության գործողության տարածքում»,- ասել է Գերասիմովը։
Նա նաև հիշեցրել է, որ «հրադադարի ու բոլոր ռազմական գործողությունների լրացուցիչ վերահսկման համար այս տարվա հունվարից Ակնայում գործում է ռուս-թուրքական համատեղ կենտրոնը»։
