Քաղաքական մեկնաբան Հակոբ Բադալյանը ֆեյսբուքյան իր էջում գրում է․
«Որ ասվում է, թե հայ-թուրքական հարաբերության շուրջ Թուրքիայի հետ ուղիղ խոսակցության մեխանիզմի համար պետք է նաեւ աշխատել Արեւմուտքի հետ, անկասկած իրավացի է ասվում:
Բայց, հայ-թուրքական հարաբերության ուղղությամբ Թուրքիայի հետ ուղիղ աշխատանքային մեխանիզմի գալու համար պետք կլինի աշխատել նաեւ առնվազն մի կողմի հետ էլ՝ Ռուսաստան, դուր գա դա մեզ, թե ոչ: Եթե որեւէ մեկը կարծում է, որ հնարավոր կլինի արդյունավետ գործընթացի գնալ «ի հեճուկս» ռուսների, ապա մեղմ ասած դա մոլորություն է: Ավելին, կարող է լինել վտանգավոր մոլորություն:
Բայց, ռուսներից էլ բացի, այսօր թերեւս կարեւորագույն ուղղություն է դառնում նաեւ մեր ռեգիոնալ միջավայրում իր դերը բարձրացնելու նկատելիորեն աշխույժ քաղաքականություն առաջ տանող արաբական աշխարհը: Օրինակ, Իսրայելի վարչապետը Թել Ավիվում Հունաստանի եւ Կիպրոսի ղեկավարների հետ հանդիպումից հետո պատմական այց է կատարում ԱՄԷ, առաջին անգամ, եւ հաստատ ոչ պարզապես ժամանակային զուգորդմամբ:
Հիշենք, ԱՄԷ-ն փորձում է մեծ դեր ունենալ թուրքական տնտեսությունում, հետեւաբար այդ կերպ նաեւ քաղաքականությունում: Երեւանի համար կարեւոր է Թուրքիայի հետ հարաբերության կարգավորման աշխատանքային ուղիղ մեխանիզմի գնալով, ձեւավորել հնարավորինս շատ հարակից «կոմունիկացիաներ»:Կա դրա նվազագույնը երկու նպատակ. ձեւավորել այդպիսով Թուրքիայի վարքագծի կանխատեսելիության որքան կարելի է, որքան հնարավոր է մեծ դաշտ, եւ մյուսը՝ որքան հնարավոր է նվազեցնել այդ գործընթացը այս կամ այն կերպ միմյանց դեմ օգտագործելու այլ խաղացողների մոտիվները, հետեւաբար՝ խանգարելու մոտիվները»: