Վարչապետ Նիկոլ Փաշինյանի՝ ավիացիայի հարցերով նախկին խորհրդական Հակոբ Ճաղարյանը Ֆեյսբուքի իր էջում այսօր՝ փետրվարի 17-ին, գրել է․ «ՀՀ-ից 5 միլիոն եվրո սուբսիդավորում ստացած ու Արցախում պատերազմական գործողությունների ընթացքում ՈՉ ՄԻ ԹՌԻՉՔ դեպի ՀՀ չկատարած, ինչպես նաև պատերազմից առաջ և հետո Քովիդի պատրվակով դեպի ՀՀ թռիչքները ԴԱԴԱՐԵՑՐԱԾ իռլանդական ավիաընկերության գլխավոր տնօրենը հայտարարել է, որ ՈՉ ՄԻ ԴԵՊՔՈւՄ ՉԵՆ ԴԱԴԱՐԵՑՆԻ թռիչքները դեպի ՈւԿՐԱԻՆԱ (այնտեղ չեն սուբսիդավորվում և Քովիդը հաղթահարված չէ) քանի դեռ Ուկրաինան չի հրթիռակոծվում» (բնագրի ուղղագրությունը պահպանված է-խմբ․):
Ճաղարյանի գրառումը որոշակի տարածում է գտել մեդիայում։ Մասնավորապես, գրառումը տարածել են News.am-ը, Panorama.am-ը, «Ավրորա Նյուզը», «Փաստինֆոն», Hayacq.com-ը, Ankakh.com-ը և այլք։
FIP.am-ը փորձեց հասկանալ՝ ինչքանո՞վ է վարչապետի նախկին խորհրդականի գրառումը առնչվում իրականության հետ։
Ryanair-ը՝ դեպի Ուկրաինա թռիչքները չդադարեցնելու վերաբերյալ
«Ryanair ավիաընկերությունը չի դադարեցնի թռիչքները դեպի Ուկրաինա, քանի դեռ չկան պատերազմ և հրթիռներ», իսկապես, հայտարարել է ընկերության գլխավոր տնօրեն Մայքլ Օ’Լիրին։
«Մենք թռիչքները դադարեցնելու պատճառ չենք տեսնում, քանի դեռ եվրոպական իշխանությունները մեզ չեն ասել, որ թռչելն անվտանգ չէ»,- ասել էր նա։
Փոխարենն ապահովագրական ընկերությունները հայտնել էին, որ չեն ապահովագրելու Ուկրաինայի օդային տարածքով թռչող ինքնաթիռները, ինչից հետո Ուկրաինայի Ենթակառուցվածքների նախարարությունը հավաստիացրել էր, որ պատրաստ է ֆինանսական երաշխիքներ տալ ավիափոխադրողներին։
Չնայած դրան, փետրվարի 12-ին նիդերլանդական KLM ավիաընկերությունը հայտարարել էր, որ դադարեցնում է թռիչքները դեպի Ուկրաինա։
Ե՞րբ էին նախատեսվում լոուքոսթերի հայաստանյան թռիչքները, ինչու՞ ընդհատվեցին
2019 թվականի հոկտեմբերին Երևանում կայացած ասուլիսի ժամանակ իռլանդական Ryanair ավիաընկերության տնօրեն Դեյվիդ Օ’Բրայենն ասել էր, որ 2020-ի հունվարից ընկերությունը կսկսի թռիչքներ իրականացնել Երևանից Հռոմ և Միլան, իսկ ամռանից՝ դեպի Բեռլին։ Ընկերության տնօրենը նաև նշել էր, որ 2020-ի ամռանից Գյումրիի օդանավակայանից թռիչքներ կիրականացվեն դեպի Մեմմինգեն (Մյունխենի մոտակայքում)։ Հունվարի 15-ին կայացավ Ryanair ավիաընկերության առաջին թռիչքը Երևանից Հռոմ։ Լոուքոսթերը (էժան պայմաններ առաջարկող ավիաընկերությունը), սակայն, Երևանից չվերթներ իրականացրեց միայն հունվար-մարտ ամիսներին՝ շաբաթական երկու օր, իսկ Գյումրուց դեպի Մեմմինգեն չվերթներ այդպես էլ չեղան, քանի որ դրանք նախատեսված էին մարտին։
2020-ի մարտին ավիաընկերությունը հայտարարել էր, որ դադարեցնում է բոլոր չվերթները Երևանից դեպի Իտալիա և հակառակ ուղղությամբ, քանի որ Իտալիայի կառավարությունը կորոնավիրուսային վարակով պայմանավորված երկրի ողջ տարածքում կարանտին էր հայտարարել։
2021-ի սեպտեմբերին COVID-19-ի տարածման և դեպքերի կտրուկ աճով պայմանավորված՝ Հայաստանը հայտնվեց Եվրամիության չափանիշներով համաճարակային առումով վտանգավոր՝ «կարմիր» գոտում, որի պատճառով ինչպես Ryanair-ը, այնպես էլ մի շարք այլ ավիաընկերություններ չվերսկսեցին իրենց չվերթները դեպի Հայաստան։
Ryanair-ի՝ Հայաստան վերադառնալու հարցում դեռ հստակություն չկա
«Փաստերի ստուգման հարթակը» զրուցեց Քաղաքացիական ավիացիայի կոմիտեի Օդային փոխադրումների կարգավորման վարչության պետ Ստեփան Փայասլյանի հետ՝ հասկանալու, թե երբ է Ryanair-ը վերադառնալու Հայաստան։
«Ես կարող եմ ասել, որ հայտ չունեմ այս պահի դրությամբ, կարող է մի ժամից հայտ գալ, կարող է՝ տասն օրից, կարող է ընդհանրապես չգա։ Եթե ստանամ հայտ, համապատասխան թույլտվությունը կտրվի, թռիչքները հնարավոր է կատարվեն, բայց այս պահին հայտ չունենք»,- ասաց Փայասլյանը։
Ryanair-ը պետբյուջեից 5 միլիոն եվրո սուբսիդավորում չի ստացել
Լոուքոստեր ընկերությունների՝ հարկատուների հաշվին սուբսիդավորելու վերաբերյալ լուրերին FIP.am-ն արդեն անդրադարձել է։ 2020-ի փետրվարին ևս լրատվամիջոցները գրում էին, որ բյուջետային ավիափոխադրողները սուբսիդավորվելու են պետբյուջեից, դարձյալ լուրեր էին շրջանառվում 5 մլն եվրո սուբսիդավորման մասին։
Դեռևս այդ ժամանակ FIP.am-ի հարցմանն ի պատասխան կառավարությունից հայտնել էին, որ ո՛չ RyanAir և ո՛չ էլ Wizz Air ավիաընկերություններին պետական բյուջեից որևէ աջակցություն նախատեսված չէ։
Այսպիսով, վարչապետի նախկին խորհրդական Հակոբ Ճաղարյանը կրկնել է դեռ երկու տարի առաջ հերքված տեղեկությունը, իսկ մի շարք լրատվամիջոցներ վերարտադրել են ապատեղեկատվությունը։
