ԱԺ նախագահ Ալեն Սիմոնյանը հայտարարել է, թե իրեն անձնական բժիշկ պետք չէ և երբ «Հատուկ պետական պաշտպանության ենթակա անձանց անվտանգության ապահովման մասին» օրենքում կատարվող փոփոխությունների նախագիծը մտնի խորհրդարան, ինքը կառաջարկի հրաժարվել անձնական բժիշկ ունենալու երաշխիքներից:
«Ինձ անձնական բժիշկ պետք չի, երբ օրենքը գա, առաջարկելու եմ, որ այն ԱԺ հաջորդ նախագահի պարագայում գործածվի: Հասկանում եմ՝ բոլոր օրենսդրական նախաձեռնություններում իմ անունն առանձնացնելու և դրա շուրջ աղմուկ սարքելու ցանկությունը: Դրանց ես անտարբեր եմ վերաբերում: Այլևս աշխատելու եմ էդ մանր թեմաների՝ մեքենաների, անձնական բժիշկ ունենալու և այլնի մասին հարցերին չպատասխանել», -Ազգային ժողովի դիմաց ցուցարարների հետ հանդիպման ժամանակ լրագրողներին ասել է Սիմոնյանը։
Հիշեցնենք՝ Հայաստանի կառավարությունը հանրային քննարկման է ներկայացրել «Հատուկ պետական պաշտպանության ենթակա անձանց անվտանգության ապահովման մասին» ՀՀ օրենքում փոփոխություններ և լրացումներ կատարելու նախագիծը, որով առաջարկվում է Ազգային ժողովի նախագահին հատկացնել անձնական բժիշկ՝ ինչպես բարձրաստիճան մյուս պաշտոնյաների դեպքում է:
«Նկատի ունենալով այն հանգամանքը, որ ներկայումս օրենքի ուժով Հանրապետության նախագահի և վարչապետի առողջական վիճակին հետևելու նպատակով առանձնացվում է անձնական բժիշկ, մինչդեռ անհասկանալի տրամաբանությամբ՝ նման երաշխիք նախատեսված չէ բարձրագույն ներկայացուցչական մարմնի, այն է՝ Ազգային ժողովի նախագահի համար, առաջարկվում է ընդլայնել նշված երաշխիքի ծավալը (սահմանվում է, որ հիշատակված պաշտոնատար անձանց և նրանց ընտանիքների անդամների (ամուսին, զավակ, ծնող) համար ապահովվում է Հայաստանի Հանրապետությունում գործող բժշկական կազմակերպություններում բժշկական օգնությունն ու սպասարկումը՝ Հայաստանի Հանրապետության պետական բյուջեի միջոցների հաշվին՝ Կառավարության սահմանած կարգով) և այն տարածել նաև Ազգային ժողովի նախագահի վրա», -նշվում է նախագծի հիմնավորումներում: