«Հայաստան» խմբակցության ղեկավար Սեյրան Օհանյանը, որն արդեն մեկ շաբաթից ավելի է՝ դիմադրության շարժման շրջանակներում խորհրդարան չի գնում և մասնակցում է փողոցային ակցիաներին, քաղաքական հետապնդման փորձ է որակում ՔՊ-ից Անդրանիկ Քոչարյանի նախաձեռնությունը:
Հիշեցնենք՝ վերջինը կոչ էր արել ՀՀ ոստիկանությանը և Ազգային անվտանգության ծառայությանը հավաքագրել փողոցում բողոքի ակցիաներին մասնակցող քաղաքացիների տվյալները և դրանք փոխանցել ՀՀ պաշտպանության նախարարությանը, որն էլ իր հերթին «կօգտագործի այս «լավ պատրաստված», պարզ հրահանգներ կատարելու ունակ երիտասարդներին՝ մեր բանակի մոբիլիզացիոն ռեսուրսը հարստացնելու և նրանց Հայաստանի ու Արցախի սահմանների անվտանգության պահպանման գործում ներգրավելու նպատակով»:
«Մեր ցուցարարների զգալի մասը և ծառայել են բանակում, և ապրիլյնա, և 44-օրյա պատերազմների մասնակիցներ են: Անդրանիկ Քոչարյանը լավ կլինի, որ իր շրջապատում փնտրի այն մարդկանց, ովքեր բանակում չեն ծառայել, խուսափել են և այլն, և այլն: Թող ինքը դրա մասին մտածի: Այս ամենը խոսում է այն մասին, որ այսօրվա իշխանությունները նույնիսկ այդ հարցերում փորձում են քաղաքականության համար իրենց հարմար պայմաններ ստեղծել: Քաղաքական հետապնդման կլասիկ օրինակ է սա», -ընդգծել է Օհանյանը: