«ՄՏՍ» ՀԲ ընկերությունը հայտարարություն է տարածել, որը ներկայացնում ենք ստորև․
«Շարժական կապի ռուսաստանյան խոշորագույն օպերատոր եւ թվային ու մեդիա ծառայությունների առաջատար մատակարար «ՄՏՍ» ՀԲ ընկերությունը հայտարարում է, որ 100% բաժնեմասով հայաստանյան իր դուստր ընկերության՝ «ՄՏՍ Հայաստան» («Վիվա-ՄՏՍ», «Viva-MTS») ՓԲ ընկերության տնօրենների խորհուրդը Վիվա-ՄՏՍ-ի գլխավոր տնօրեն է նշանակել Արմեն Ավետիսյանին:
Մինչեւ նշանակումը Արմեն Ավետիսյանը զբաղեցրել է «ՄՏՍ» ՀԲԸ իրերի ինտերնետի եւ արդյունաբերական ավտոմատացման հարցերով փոխնախագահի պաշտոնը:
Արմեն Ավետիսյանը ՏՏ եւ հեռահաղորդակցության ոլորտում աշխատանքային գործունեությունն սկսել է 2004 թվականին՝ հեռահաղորդակցային եւ ՏՏ խոշոր ընկերություններում գլխավորելով տեխնիկական եւ կոմերցիոն վարչություններ: 2013-2016 թվականների ընթացքում նա ղեկավարել է «ՄՏՍ» ընկերության մասնաճյուղը Ռուսաստանի Դաշնության Կրասնոյարսկի մարզում, իսկ 2016-2021 թվականների ընթացքում աշխատել է որպես «ՄՏՍ» ընկերության ռեգիոնալ զարգացման գծով տնօրեն:
«ՄՏՍ» ընկերության՝ իրերի ինտերնետի եւ արդյունաբերական ավտոմատացման հարցերով փոխնախագահի պաշտոնն Արմեն Ավետիսյանը զբաղեցրել է 2021 թվականի մարտից մինչեւ գլխավոր տնօրենի պաշտոնում նշանակվելն ու պաշտոնավարման ընթացքում կառուցել է ընկերության նոր բիզնես ուղղություն իրերի ինտերնետի ոլորտում: Ավարտել է Ռուսաստանի՝ Գ. Վ. Պլեխանովի անվան տնտեսագիտական համալսարանի «Բանկային գործ» ֆակուլտետը:
«ՄՏՍ Հայաստան» ընկերության նախկին գլխավոր տնօրեն Ռալֆ Յիրիկյանը, որը ընկերությունը գլխավորել է 2004 թվականին՝ այն հիմնադրելու պահից ի վեր, եւ որի ղեկավարությամբ Վիվա-ՄՏՍ-ը դարձել է Հայաստանում հեռահաղորդակցության ոլորտի անվիճելի առաջատար, լքում է ընկերությունը՝ գործարար այլ նախագծերով զբաղվելու համար»,- ասված է հայտարարության մեջ:
