Ստյոպա Սաֆարյանը կիսվել է մի տեսանյութով, որը հատված է Մարտի 1-ին սպանված Զաքար Հովհաննիսյանի գործով ձերբակալված ոստիկանության շտաբի նախկին պետ Գեղամ Պետրոսյանի հարցաքննությունից («Հայաստանի կորսված գարունը» ֆիլմից)։
«Մարտի 1-ի 10 սպանություններից մեկի կատարողը կարծեք թե պարզ է: Չգիտեմ՝ սա է եղել, թե մեկ ուրիշը, Փաստահավաք խմբում հարցաքննության ժամանակ սպառնացել էր նաև քրոջս՝ Սեդա Սաֆարյանին, ում ձայնը լսում եք տեսանյութում: Իսկ Քոչարյանի աջակիցները իրենց պատեպատ էին տալիս, թե ուր են 10 սպանության մեջ մեղադրվողները: Ահա նրանցից մեկը: Դե հիմա արտահայտվեք, մեջներդ մի պահեք…»,-իր գրառման մեջ նշել է Սաֆարյանը։
Հիշեցնենք, որ այսօր սպանություն կատարելու կասկածանքով Մարտի 1-ի գործով ձերբակալվել է ոստիկանության շտաբի նախկին պետ Գեղամ Պետրոսյանը։ Այս մասին տեղեկացնում է ՀՔԾ-ն։
Հատուկ քննչական ծառայության հաղորդագրության համաձայն, 2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի շրջանակներում 04.06.2019 թվականին ՀՀ քրեական օրենսգրքի 104-րդ հոդվածի 1-ին մասով նախատեսված հանցանք կատարելու` հրազենի գործադրմամբ Զաքար Հովհաննիսյանին դիտավորությամբ կյանքից զրկելու կասկածանքով ձերբակալվել է 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, նույն ինքը` շտաբի պետի պաշտոնը զբաղեցրած Գեղամ Պետրոսյանը:
Լուսանկարում ձախից` Զաքար Հովհաննիսյանը։
