Ադրբեջանական կողմի հերթական սադրանքների, գործողությունների համատեքստում ավելի ու ավելի հրատապ է դառնում Լեռնային Ղարաբաղ և Լաչինի միջանցք անհապաղ միջազգային փաստահավաք առաքելության գործուղումը: «Արմենպրես»-ի հաղորդմամբ՝ այս մասին հայտարարեց ՀՀ վարչապետ Նիկոլ Փաշինյանը կառավարության նիստում՝ անդրադառնալով Արցախում Ադրբեջանի ԶՈՒ դիվերսիոն խմբի հարձակմանը, որի հետևանքով Արցախի Ներքին գործերի նախարարության ոստիկանության 3 ծառայող է զոհվել:
«Այս ամենի ընդգծմամբ ավելի ու ավելի հրատապ է առնում ԼՂ և Լաչինի միջանցք անհապաղ միջազգային փաստահավաք առաքելության գործուղումը՝ կանխելու համար Ադրբեջանի կողմից նոր ագրեսիայի սանձազերծումը և ԼՂ ժողովրդին էթնիկ զտումների ու ցեղասպանության ենթարկելու Ադրբեջանի ակնհայտ նախապատրաստությունները, որոնք արտահայտվում են միջազգային դատարանների որոշումները չկատարելով, Լաչինի միջանցքը փակելով, ռազմական սադրանքներ ու ահաբեկչական գործողություններ ձեռնարկելով»,-ասաց վարչապետը:
Միևնույն ժամանակ, Փաշինյանը վերահաստատեց Հայաստանի՝ տարածաշրջանում խաղաղության հասնելու ձգտումը և խաղաղության օրակարգին հավատարմությունը:
