«Ազատություն» – Եվրոպայի ծանրամարտի ֆեդերացիան խստորեն դատապարտում է երեկ Երևանում ծանրամարտի Եվրոպայի առաջնության բացման արարողության ժամանակ տեղի ունեցած միջադեպը, երբ մի անձ հրկիզեց Ադրբեջանի դրոշը, ասված է ֆեդերացիայի հայտարարությունում:
Ֆեդերացիան «այս ծայրաստիճան լուրջ և ցավալի ժեստը համարում է հարձակում մարզական ազնիվ արժեքների և Արդար խաղի համընդհանուր սկզբունքների վրա»:
«Եվրոպայի ծանրամարտի ֆեդերացիան անմիջապես արձագանքեց այս միջադեպին` հայտնելով իր հաստատակամ դիրքորոշումը Կազմկոմիտեի նկատմամբ և խնդրելով լրացուցիչ երաշխիքներ այս մրցաշարի բոլոր մասնակիցների անվտանգության համար: Եվրոպայի ծանրամարտի ֆեդերացիան մշտապես գտնվել է Ադրբեջանի Հանրապետության պատվիրակության հետ՝ իր ամբողջական համերաշխությունն ու աջակցությունը հայտնելով մարզիկներին, մարզիչներին և պաշտոնյաներին», – ասված է հայտարարությունում:
Միաժամանակ, ֆեդերացիան համարում է, որ «այս միջադեպը մեկուսացված է, և կհետևի Կազմկոմիտեից հրատապ պահանջվող լրացուցիչ միջոցառումների իրականացմանը»:
Ափսոսանք հայտնելով, որ Ադրբեջանի պատվիրակությունը «ստիպված է եղել լքել մրցույթը», ֆեդերացիան միաժամանակ նշում է, որ հարգում է այդ որոշումը։ «Մենք անմիջականորեն ներգրավված էինք պատվիրակության անվտանգության բոլոր պայմանների ապահովման գործում, մինչև այն հեռացավ Հայաստանից», – ասված է հայտարարությունում:
Ավելին՝ սկզբնաղբյուրում
