Մոսկվայում անբարենպաստ եղանակի զոհ է դարձել 2, վիրավորվել է 15 մարդ: «Արմենպրես»-ի փոխանցմամբ՝ այդ մասին հայտնել է Մոսկվայի քաղաքապետ Սերգեյ Սոբյանինը։
«Այսօր Մոսկվային պատուհասել է վատ եղանակը. ուժեղ քամի՝ ջերմաստիճանի անկումներով․… Ցավոք, կան զոհեր․ տուժել է 17 մարդ, նրանցից երկուսը մահացել են», – գրել է Սոբյանինն իր Telegram ալիքում։
Նա ցավակցություն է հայտնել զոհվածների ընտանիքներին և հայտնել, որ բոլոր տուժածներին ցուցաբերվում է անհրաժեշտ բուժօգնություն։
Քաղաքապետի խոսքով՝ Մոսկվայի իշխանությունները ժամանակին ձեռնարկել են ուժեղ քամու հետ կապված նախազգուշական բոլոր միջոցները:
«Խոշոր քաղաքային զբոսայգիները և մյուս բաց հասարակական վայրերն օպերատիվորեն փակվել են: Վտանգի մասին հաղորդագրությունները եղել են քաղաքի էկրաններին, Ճանապարհային երթևեկության կազմակերպման կենտրոնի ծանուցման ցուցատախտակներին և այլն…․ Ներկայում քաղաքային ծառայություններն օպերատիվ ռեժիմով ձեռնարկում են բոլոր միջոցները հետևանքները վերացնելու համար», – հավելել է Սոբյանինը։
Մոսկվայում ավելի վաղ հայտարարվել էր եղանակային վտանգի «դեղին» մակարդակ։
