Խաչատուր Սուքիասյանի նկատմամբ քրեական հետապնդումը դադարեցվել է,հայտնում են նրա փաստաբաններ Արա Զաքարյանն ու Արթուր Գրիգորյանը` տարածած հաղորդագրության մեջ:
Հիշեցնենք, որ խոշոր գործարար Խաչատուր Սուքիասյանի հանդեպ քրեական հետապնդումը սկսվել է 2008-ի մարտիմեկյան հայտնի դեպքերից հետո, երբ ԱԺ պատգամավոր, «Սիլ գրուպ» կոնցեռնի հիմնադիրը միացել էր ընդդիմությանը պայքարին ընդդեմ ընտրությունների արդյունքների:
«Այսօր` 2011 թվականի փետրվարի 8-ին Հայաստանի Հանրապետության հատուկ քննչական ծառայության քննչական խմբի ղեկավարից ստացել ենք մեր պաշտպանյալ` պարոն Խաչատուր Սուքիասյանի նկատմամբ քրեական հետապնդումը դադարեցնելու մասին 2010 թվականի հոկտեմբերի 19-ի որոշումը», – նշված է հաղորդագրությունում:
Սուքիասյանը հետախզուման մեջ էր գտնվում մինչեւ 2009 թվականի սեպտեմբերի 2-ը, երբ ընդհատակից ինքնակամ ներկայացավ իրավապահներին: Նրան մեղադրանք առաջադրվեց Քրեական օրենսգրքի 225 հոդվածի առաջին մասով` «զանգվածային անկարգություններ կազմակերպելը»:
Հաշվի առնելով` նրա ինքնակամ է ներկայանալու փաստը, նախաքննական մարմինը սեպտեմբերի 4-ին փոխեց Սուքիասյանի նկատմամբ որպես խափանման միջոց կիրառված կալանավորումը: Կարճ ժամանակ անց, նա վայր դրեց պատգամավորական մանդատը և բուժման նպատակով լքեց Հայաստանը:
«Նշված որոշմամբ քրեական հետապնդումը դադարեցվել է Հայաստանի Հանրապետության քրեական դատավարության օրենսգրքի 35-րդ հոդվածի 2-րդ մասով, այսինքն` հանցագործության կատարմանը մեր պաշտպանյալի մասնակցությունն ապացուցված չլինելու պատճառով», – նշված է հաղորդագրության մեջ:
Այսօր լրագրողների հետ հանդիպման ժամանակ, վարչապետ Տիգրան Սարգսյանն անրադառնալով Սուքիասյանի դեմ քրեական հետապնդման դադրեցմանը, նշել է, թե ծանոթ չէ որոշմանը:
«Ես այս հայտարարությանը դեռ ծանոթ չեմ: Կնայեմ, թե ինչ է հրապարակվել»,-ասել է Սարգսյանը։
© Medialab.am