Պաշտպանը դպրոցականների հետ առցանց քննարկել է արտակարգ դրության պայմաններում մարդու իրավունքների հարցեր

Մարդու իրավունքների պաշտպան Արման Թաթոյանը մայիսի 15-ին «Ջինիշյան» հիշատակի հիմնադրամի առաջարկով առցանց քննարկում է ունեցել Գյումրիի և Երևանի մի շարք դպրոցների աշակերտների հետ, տեղեկացնում են Հայաստանի մարդու իրավունքների պաշտպանի աշխատակազմից։

Արման Թաթոյանը երեխաներին է ներկայացրել Մարդու իրավունքների պաշտպանի աշխատանքը երեխաների իրավունքների պաշտպանության գործում, անդրադարձել արտակարգ դրության սահմանափակումների արդյունքում մարդու իրավունքների պաշտպանության հարցին։

Երեխաներն իրենց հարցերն են ուղղել Մարդու իրավունքների պաշտպանին, որոնք վերաբերվել են հեռավար կրթությանը, նոր կորոնավիրուսի պայմաններում մարդու իրավունքների պաշտպանությանը, մասնավորապես՝ ազատ տեղաշարժման իրավունքի սահմանափակմանը, աշխատանքային իրավունքներին և այլն։