«Իմ քայլը» խմբակցության ղեկավար Լիլիթ Մակունցը վստահեցնում է, որ երկրում քաղաքական հայտարարությունները ոչ ոք չի կարող սահմանափակել, ինչպես նաև չեն կարող սահմանափակվել պատասխան քաղաքական հայտարարությունները: «Արմենպրես»-ի հաղորդմամբ՝ Մակունցը նման տեսակետ հայտնեց արտակարգ դրության ժամկետը երկարաձգելու հարցով գումարված ԱԺ հատուկ նիստում:
Անդրադառնալով գործընկերների տեսակետներին՝ բողոքի ձայն հնչեցնելու իրավունքի մասին, նա ասաց. «Իհարկե, բողոքի ձայն հնչեցնելու իրավունքը երաշխավորված է ՀՀ սահմանադրությամբ և օրենքներով: Միևնույն ժամանակ, ՀՀ սահմանադրությունը ենթադրում է հատուկ իրավիճակներում արտակարգ դրության սահմանում, որն իր հերթին ենթադրում է հատուկ իրավական ռեժիմ: Եվ ՀՀ բոլոր քաղաքացիները, Հայաստանում գտնվող բոլոր անձինք պարտավոր են ենթարկվել այդ իրավական ռեժիմով սահմանված բոլոր միջոցառումներին և վարքագծին՝ անկախ մասնագիտությունից, զբաղեցրած դիրքից, քաղաքական կուսակցության պատկանելությունից: Քաղաքական հայտարարություններն, իհարկե, ոչ ոք չի կարող սահմանափակել, ինչպես նաև չեն կարող սահմանափակվել պատասխան քաղաքական հայտարարությունները»,-ասաց Մակունցը:
Նա նշեց, որ քաղաքական, ոչ այնքան քաղաքական միավորներն ազատ են քաղաքական օրակարգ ձևավորելու համար: «Բայց, եթե այդ արտահայտությունը հնչեցնելով նկատի է առնվում վերջին շրջանում շատ ակտիվ շրջանառվող միակ քաղաքական օրակարգը, այն է՝ կառավարության և վարչապետի հրաժարականի պահանջը, ապա վերահաստատում են արտակարգ դրության պայմաններում «Իմ քայլը» խմբակցության քաղաքական դիրքորոշումը»,-ասաց խմբակցության ղեկավարը:
