Հայաստանում ԱՄՆ դեսպանատունը Սիվիլիթաս հիմնադրամի կողմից ԱՄՆ հարկատուների գումարներով կատարված ծրագրերի նկատմամբ մտահոգություններ չունի: Այս մասին այսօր Սիվիլիթաս հիմնադրամի գրասենյակում հայտարարեց Հայաստանում ԱՄՆ արտակարգ և լիազոր դեսպան Ջոն Հեֆերնը: Նա նշեց, որ Ազգային անվտանգության ծառայության կողմից քննության ենթարկվող ծրագրերից երեքը ամերիկյան ծրագրեր են, որոնք իրականացվել են ճիշտ ժամանակին:
«Դրանք իրականացվել են ճիշտ ժամանակին, մենք հարցեր չունենք, թե ինչպես են ամերիկյան հարկատուների գումարներն իրացվել: Մենք տուժողներ չենք տեսնում, ոչ ոք որևէ բողոք չի հայտնել: Մենք համոզված ենք, որ այստեղ հետաքննելու ոչինչ չկա Ազգային անվտանգության ծառայության և որևէ այլ կառույցի կողմից»,- ասաց Ջոն Հեֆերնը:
Լրագրողների այն հարցին, թե տեղի ունեցածում քաղաքական շարժառիթ տեսնո՞ւմ է, Ջոն Հեֆերնը պատասխանեց, որ շարժառիթների մասին դատողություններ անել չի կարող: «Իմ կարծիքով, սա օրինական քննություն չէ, ուղղակի չեմ կարող ասել, թե ինչ է իրենից ներկայացնում այն»,- ասաց դեսպանը:
Հայաստանում Գերմանիայի դեսպան Ռայներ Մորելն իր հերթին հայտարարեց, որ Սիվիլիթասը դրական փոփոխություն է բերում Հայաստանում ժողովրդավարության առումով: Նա նշեց, որ գերմանական կողմը նույնպես ֆինանսավորել է Սիվիլիթասի ծրագրերը, և եթե կազմակերպությունը գործում է օրենքին համապատասխան, ոչ մի խնդիր չկա գումար հատկացնելու մասով:
Ամբողջական հոդվածը կարող եք կարդալ այստեղ