Վատիկանում ՀՀ նախկին դեսպան Միքայել Մինասյանը «բացահայտել» է, որ ԱԺ նախագահ Արարատ Միրզոյանը Թուրքիայի հատուկ ծառայությունների ու ՀՀ ԱԱԾ գործակալ է։
Միքայել Մինասյանը ևս մի անգամ վրիպեց: Նա ասում է, որ Արարատ Միրզոյանը թուրքական ՄԻԹ-ի ուշադրության կենտրոնում է հայտնվել 2005-ին ԱՄՆ-ում սովորելու տարիներին։ Իսկ 2007-ին արդեն դարձել է ՀՀ ԱԱԾ գործակալ։ Ու հրապարակել է ԱԱԾ գործակալ դառնալու դիմումը։ Հիմա տեսնենք՝ ինչպես է վրիպել մեր Ջեյմս Բոնդը։
Նա գիտի, թե հայ մարդու համար պատերազմում Ադրբեջանից ու Թուրքիայից խայտառակ պարտություն կրելուց հետո ինչ է նշանակում տեղեկանալ, որ ինչ-որ մի հայ եղել է Թուրքիայի հատուկ ծառայությունների գործակալ։
Հնարավոր է՝ նա կոնկրետ փաստերով գիտի, որ Արարատն իսկապես 2007-ին դարձել է ԱԱԾ գործակալ։ Չնայած մեր ԱԱԾ-ն դա հերքել է, բայց ընդունենք, որ Միքայել Մինասյանը ճիշտ է՝ Արարատը 2007-ից ԱԱԾ գործակալ է։
Միքայել Մինասյանին հենց միայն 2007-ին Արարատի ԱԱԾ գործակալ լինելու հանգամանքը հերիք էր, որ խայտառակեր՝ մարդը մարտի 1-ից առաջ եղել է ԱԱԾ գործակալ։ Այսինքն՝ մարտի 1-ին էդ մարդը՝ Արարատը, կեղծ է կանգնել ընդդիմության կողքին, իրականում դանոսչիկ է եղել։
Այսքանը հերիք է, որ Արարատը նույնիսկ իր տան արժանի հայր լինելու իրավունք չունենա, դա հերիք է, որ ստախոսը հեռու մնա իր երեխայից։
Դուք պատկերացնո՞ւմ եք, թե մարտի 1-ից առաջ իշխանությանը ծառայած մարդու դաստիարակած երեխան ինչ արժեքներ պիտի ունենա։
Ես դժվար եմ պատկերացնում։ Չեմ վախենա ասել, որ այսպիսով Արարատը պատասխանատու է դառնում մարտի 1-ի 10 զոհերի համար։ Չէ՞ որ ԱԱԾ-ն ու Ռոբերտ Քոչարյանի իշխանությունն այդ ժամանակներում նույն բանն էին։
Միքայել Մինասյանն ակնհայտորեն որոշել է մարդուն պետության թշնամի դարձնել ամենաբարձր դոզայով։ Որովհետև ինքնին ԱԱԾ գործակալ լինելը նրա համար մեծ մեղք չէ, ի վերջո, մարդն իրենց իշխանության ժամանակ է եղել գործակալ։
Եթե, իհարկե, եղել է։ Այսինքն՝ պարոն Մինասյանն էլ գիտի, որ Արարատը Թուրքիայի գործակալ չէ, բայց որպեսզի էդ մարդու դավաճանությունը կերցնի, դոզան ավելացրել է՝ Թուրքիայի գործակալ է:
Միքայել Մինասյանը Արարատին գործակալ է դարձնում, այսինքն՝ դավաճանի պիտակ է կպցնում, որ հետին թվով արդարացնի այն բռնությունը, որին ենթարկվեց ԱԺ նախագահը, որպեսզի այսօր Րաֆֆու Սամվելի սպանած հերոսների հասցեին ասվածի նման ժողովուրդն իմանա՝ արժանի էր: Առաջին անգամ արդարացնել չստացվեց Արարատի ծեծը, անցել են երկրորդ արարին:
Բայց այստեղ մի ուրիշ խնդիր էլ կա, որը քաղաքական գործիչ Միքայել Մինասյանի դեպքում կոպիտ, շատ կոպիտ վրիպում է. մեր ԱԱԾ-ն, Արարատ Միրզոյանին հավաքագրելով, օգտագործում է Թուրքիայի դեմ, ինչո՞ւ ես բացահայտում:
Այսինքն՝ Էրդողանին տեղեկացնում ես, որ էս գործակալը, որը, ձեր կարծիքով՝ ձերն է, իրականում Հայաստանի՞նն է: Հիմա ո՞վ է Թուրքիայի գործակալը՝ Արարա՞տը, թե՞ Միքայել Մինասյանը:
Իսկ եթե ա՞յլ բան է տեղի ունեցել՝ ԱՄՆ-ում սովորելու տարիներին Արարատը հայտնվել է Թուրքիայի հատուկ ծառայությունների ուշադրության կենտրոնում, որոնք խոսել են նրա հետ, փորձել են հավաքագրել, այդ մասին Արարատն ասել է ԱԱԾ-ին, որն էլ խրախուսել է Թուրքիայի հետ հետագա շփումնե՞րը:
Հնարավո՞ր է:
Գուցե: Գուցեև՝ ոչ: Բայց դու փաստորեն մի մեծ, գուցե հաջողված օպերացիա՞ ես բացահայտել ու ընդհանրապես փոզմիշ արել ՀՀ շահը:
Միքայել Մինասյանը նման է երեխայի, որի ձեռքից վերցրել են խաղալիքը, ու ինքը, ոտքերը գետնին խփելով, պահանջում է իր խաղալիքը:
Ի՞նչ կարիք կա էսպիսի լյուստրացիայի գնալ՝ Թուրքիայի հետ մեր բոլոր հաշիվները փակե՞լ ենք, կարելի է բոլոր խաղաքարտերը բացե՞լ։
Ինքդ ես գրում, որ Արարատը մեր ԱԱԾ-ի շնորհիվ դարձել է двойной агент։ Ինչու՞ ես բացահայտում մեր двойной агент-ին։
Սա ի՞նչ կարճատեսություն է։ Կամ եթե Թուրքիայի գործակալ Արարատ Միրզոյանը պատգամավոր է ընտրվել փաստորեն Վանեցյանի գլխավորած ԱԱԾ գիտությամբ, գուցե Վանեցյա՞նն էլ է Թուրքիայի համար աշխատում: Կողմնորոշվեք։ Հետո փորձեք իշխանություն վերցնել՝ Նիկոլից կամ Թուրքիայից։
Մհեր Արշակյան
MediaLab.am