Դիմորդների բողոքները ստանում են քաղաքական երանգ, քանի որ այստեղ ներգրաված ու դրանք կազմակերպող անձանցից մեկը Ռոբերտ Քոչարյանի սատարողներից է։ Այդ մասին Հանրային հեռուստաընկերությանը տված հարցազրույցում հայտարարեց Կրթության, գիտության, մշակույթի և սպորտի նախարար Արայիկ Հարությունյանը։
«Ուզում եմ դիմորդների ու նրանց ծնողների ուշադրությանը հրավիրել այդ հանգամանքի վրա, որպեսզի չընկնեն այդ հոսանքների մեջ», -հավելեց նախարարը։
Նա տեղեկացրեց, որ անցած շաբաթ քննությունների արդյունքներից դժգոհ խումբը նախարարությունում հանդիպման արդյունքներով ստացել էր իրենց հուզող հարցերի պատասխանները և բավարարվել։ Սակայն մի քանի օր անց նորից սկսել են բողոքի ակցիաներ։
Նախարարի ներկայացրած տվյալներով, ընդհանուր եղել է 9372 դիմորդ, որոնք դրական գնահատական են ստացել։ Նրանցից 8706-ը ընդունվել է։ Այնուհետև թափուր տեղերի համար մրցույթին դիմել է մոտ 520 դիմորդ, որոնցից չեն ընդունվել 49-ը, ընդունվել՝ 472-ը։
«Այս ամենի արդյունքում մենք ունեցել ենք այնպիսի իրավիճակ, որ չընդունվողների թիվը եղել է 200։ Ինչ վերաբերում է բարձր բալ հավաքած և բուհ չընդունված դիմորդներին, մենք նրանց առաջարկել էինք դիմել թափուր տեղերի մրցույթին և ընդունվել։ Բացի այդ, նրանց առաջարկել ենք այս գնահատականներով դիմելով բուհեր հեռակայի քննության ժամանակ, գնալ սովորել», -ներկայացրեց նախարարը։
Մանրամասն՝ տեսանյութում
