Պատգամավոր Նիկոլ Փաշինյանն ԱԺ արտահերթ նիստում արձանագրեց, որ փոխվարչապետ Արմեն Գևորգյանը հերքում է ՎՊ բացահայտումները, ինչը բնական է:
«Եթե ընդունեք այն, ինչ գրված է, կառավարությունը պետք է հրաժարական տար, եթե չեք ընդունում, նշանակում է, որ կառավարությունը շարունակելու է նույն տեմպերով պետական միջոցների զանգվածային փոշիացումը»,- ասաց Նիկոլ Փաշինյանը:
Նա հիշեցրեց, որ նախորդ տարվա սեպտեմբերին փաստացի նույն խնդիրների մասին խոսեց նաև Սերժ Սարգսյանը՝ բարձրացնելով ատկատների հարցը, բայց զարմանալի է, որ նույն կառավարությունը շարունակում է պատշտոնավարել: Եթե Արմեն Գևորգյանը հերքում է ՎՊ բացահայտումները, ըստ Նիկոլ Փաշինյանի, հերքում է Սերժ Սարգսյանի հայտարարություները, քանի որ նախորդ տարվա իններորդ ամսում էր Սերժ Սարգսյանը խիստ ելույթ ունեցել կառավարությունում, իսկ ՎՊ հաշվետվությունը նույնպես վերաբերում է 2012 թվականին:
Նիկոլ Փաշինյանը նաև հիշեցրեց, որ Սերժ Սարգսյանը հանձնարարել էր գլխից բռնել խոշորին: «Գլխից պիտի բռնեք, եկել եք, ասում, որ Վայոց ձորի գյուղատնտեսության վարչության պետին բռնել եք: Մեծին գտաք հա՞, դա Վայոց ձորի գյուղատնտեսության վարչության պե՞տն էր»,- հարցադրում արեց պատգամավորը:
Նիկոլ Փաշինյանը նաև Արմեն Գևորգյանին անձամբ մեղադրեց ատկատներին մասնակից լինելու մեջ՝ նշելով, որ ըստ մամուլի հրապարակումների, փոխվարչապետը «Տոյոտա Արմենիա» ընկերության սեփականատերերից է: Ողջ պետական համակարգն, ըստ Փաշինյանի, գնումներ է կատարում «Տոյոտա Արմենիա» ընկերությունից:
«Ստացվում է, որ դա ատկատի ձևերից մեկն է, եթե դուք չլինեիք սեփականատերը, պետք է ատկատ տային կառավարությանը: Բայց ձեր միջոցով դա օրինականացվում է, դա նույն ատկատն է»,- նշեց Նիկոլ Փաշինյանը:
Ամբողջական հոդվածը կարող եք կարդալ այս հասցեով՝ http://www.lragir.am/index/arm/0/country/view/84316#sthash.5uUdlpGM.dpuf