Մոսկվան պատրաստ է հարթակ տրամադրել Հայաստանի, Ադրբեջանի և Ռուսաստանի ԱԳ նախարարների հանդիպման համար

Հեղինակ MediaLab

Ռուսաստանի արտգործնախարար Սերգեյ Լավրովը Հայաստանի և Ադրբեջանի արտգործնախարարների հետ առանձին հեռախոսազրույցներում հաստատել է պատրաստակամությունը՝ Մոսկվան առաջարկելու որպես Լեռնային Ղարաբաղի հակամարտության կարգավորման հարթակ և եռակողմ հանդիպման վայր:

«Արմենպրես»-ն այս մասին տեղեկցավ ՌԴ ԱԳՆ-ի տարածած հայարարությունից: Սեպտեմբերի 30-ին Ռուսաստանի արտգործնախարար Սերգեյ Լավրովը առանձին հեռախոսազրույցներ է ունեցել Ադրբեջանի արտգործնախարար Ջեյհուն Բայրամովի և Հայաստանի արտգործնախարար Զոհրաբ Մնացականյանի հետ: Քննարկվել է Լեռնային Ղարաբաղի հակամարտության գոտում իրավիճակի զարգացումը: Ռուսական կողմը լուրջ անհանգստություն է հայտնել շարունակվող լայնամասշտաբ ռազմական գործողությունների կապակցությամբ:

Կոչ է արվել անհապաղ դադարեցնել կրակը և լարվածությունը ապաէսկալացնել, ինչպես նաև կանխել սադրիչ և ռազմատենչ հռետորաբանությունը:

Ընդգծվել է կողմերի՝ շուտ բանակցային սեղան վերադարձի անհրաժեշտությունը: Սերգեյ Լավրովն ընդգծել է, որ Ռուսաստանը կշարունակի ինչպես իր ազգային կարողությամբ, այնպես էլ ԵԱՀԿ Մինսկի խմբի մյուս համանախագահների հետ համատեղ գործադրել միջնորդական ջանքեր `ուղղված քաղաքական և դիվանագիտական միջոցներով Լեռնային Ղարաբաղի հակամարտության կարգավորման պայմանների ստեղծմանը:

Վերահաստատվել է պատրաստակամությունը՝ համապատասխան շփումներ կազմակերպելու համար տրամադրել մոսկովյան հարթակը, այդ թվում՝ Ադրբեջանի, Հայաստանի և Ռուսաստանի արտգործնախարարների հանդիպում անցկացնելու համար: