«Ամո՛թ», «Արդարություն», «Նեմեց մարդասպան» վանկարկելով այսօր բազմաթիվ քաղաքացիները նախատեսվածի համաձայն հավաքվեցին «Հարսնաքար» ռեստորանի մոտ՝ երեկ հոսպիտալում դաժան ծեծից մահացած Վահե Ավետյանի հիշակին կազմակերպված մոմավառություն բողոքի ակցիային մասնակցելու:
Հասարակական ցասումն առաջացավ այն բանից հետո, երբ հունիսի 17-ին Վահե Ավետյանն իր ընկերների հետ դաժան ծեծի ենթարկվեց «Հարսնաքարի» ավտոկայանատեղիում:
Չնայած անձրեւին, բազաթիվ քաղաքացիական դիրքորոշում ունեցողներ իրենց բողոքն արտահայտեցին, պատերի երկայնքով մոմավառություն կազմակերպելով, իսկ պատերին «Հանցաքար», «Սպանդանոց» եւ նմանատիպ գրություններ թողնելով:
Չնայած բողոքի ալիքին եւ ոստիկանների դիմադրությանը, վանկարկումներին եւ աղմուկին, «Հարսնաքարում» մարդիկ կային, որոնք նույնիսկ նման իրավիճակում շարունակում էին խնջույք անել, իսկ ավելի ուշ հաղորդվում էր նաեւ հրավառության մասին:
Հիշեցնենք, որ 33-ամյա երկու անչափահաս երեխայի հայր Վահե Ավետյանը մահացել է երեկ՝ 12 օր կոմայի մեջ գտնվելուց հետո: Դաժան ծեծի հետեւանքով ծայրահեղ վնասվել էր Վահե Ավետյանի գլուխը՝ ուղեղում առաջացել էր հեմատոմա, որի հետեւանքով գլխուղեղի մի կիսագունդը որոշ չափով տեղափոխվել է մյուս կիսագնդի մեջ:
Հունիսի 17-ին՝ ծեծից հետո, գիշերը 03:00-ին նա հոսպիտալ էր տեղափոխվել եւ ենթարկվել գանգուղեղի վիրահատության: Սակայն, աղոտ հույսերն այն մասին, որ նա կփրկվի չէին արդարացել նույնիսկ երկրորդ վիրահատությունից հետո:
ՀՀ ՊՆ Երևանի կայազորի հոսպիտալի ուրոլոգիայի բաժնի պետ, մայոր Վահե Ավետյանը մահացել էր հունիսի 29-ի՝ երեկոյան:
Գործի կապակցությամբ ձերբակալվել էին 7 հոգի՝ ռեստորանային համալիրի 5 անվտանգության ծառայող, 1 մենեջեր եւ 1 մատուցող:
«Դուք չեք կարող պատկերացնել իմ ապրումները»,-ի պատասխան tert.am-ի հարցման պատասխանել էր «Հարսնաքարի» սեփականատեր իշխանական ՀՀԿ պատգամավոր Ռուբեն Հայրապետյանը,որի խոսքերին շատերը խիստ վերապահումով են մոտենում-Ուզում եք ասեմ, որ բոլոր մեղավորները կպատժվե՞ն. իհարկե կպատժվեն, օրենքի ողջ խստությամբ կպատժվեն: Բայց ի՞նչ դրանից, կվերադարձնե՞նք Վահեին, իհարկե չենք կարող: Ի՞նչ պիտի ասեմ նրա ընտանիքին»:
«Հարսնաքարի» մոտ տեղի ունեցած մոմավառությունից հետո, վաղը՝ ժամը 13:00-ին նախատեղվում է բողոքի ակցիա անցկացնել ՀՀ նախագահական նստավայրի դիմաց:
© Medialab.am
Տեսանյութը՝ «Մեդիալաբի»