Գերմանիա – Բրազիլիա՝ 7:1

Գերմանիա - Բրազիլիա՝ 7:1
Գերմանիա – Բրազիլիա՝ 7:1

Բրազիլիայում անցկացվող ֆուտբոլի աշխարհի առաջնության առաջին կիսաեզրափակիչ խաղում երեքշաբթի օրը Գերմանիայի հավաքականը խոշոր՝ 7:1 հաշվով  առավելության հասավ դաշտի տերերի նկատմամբ։

Արդեն առաջին խաղակեսում գերմանացիները հինգ անպատասխան գնդակ ուղարկեցին բրազիլացիների դարպասը, ևս երկու գոլ նրանք խփեցին երկրորդ խաղակեսում, և միայն խաղի ավարտից վայրկյաններ առաջ դաշտի տերերը կարողացան մեկ գնդակով կրճատել հաշվի տարբերությունը։

Գերմանիայի գոլերից մեկի հեղինակը դարձավ և աշխարհի առաջնություններում խփած 16 գնդակներով բրազիլացի Ռոնալդոյի ռեկորդը գերազանցեց 36-ամյա հարձակվող Միրոսլավ Քլոզեն։

Աշխարհի հնգակի չեմպիոն, ընթացիկ առաջնության գլխավոր ֆավորիտներից մեկը համարվող Բրազիլիայի պարտությունը նման հաշվով այս մրցաշարի մինչ օրս ամենամեծ սենսացիան է։

Չորեքշաբթի օրը երկրորդ կիսաեզրափակիչ Նիդերլանդներ – Արգենտինա խաղի արդյունքում հայտնի կդառնա հուլիսի 13-ին կայանալիք եզրափակիչի մյուս մասնակիցը։

Եզրափակիչ հանդիպման նախօրեին կիսաեզրափակիչում պարտված թիմերը կպայքարեն երրորդ տեղի համար։

Պայքարը շարունակող թիմերից, հիշեցնենք, Գերմանիան երեք անգամ է նվաճել աշխարհի չեմպիոնի կոչումը, Արգենտինան՝ երկու, Նիդերլանդները դեռ երբևէ աշխարհի չեմպիոն չի դարձել։