Ադրբեջանցի ամենահայտնի իրավապաշտպաններից մեկին` Լեյլա Յունուսին Ադրբեջանի Գլխավոր դատախազության ծանր հանցագործությունների գծով քննչական վարչություն բերման ենթարկեցին այսօր կեսօրին` տանից դուրս գալուց անմիջապես հետո:
Ըստ ադրբեջանական աղբյուրների՝ քաղաքացիական հագուստով երեք իրավապահներ սկզբում փակեցին Յունուսի ավտոմեքենայի ճանապարհը, ապա ստիպեցին նրան հետևել իրենց` ուղևորվելով դատախազություն: Իրավապահների մեկ այլ՝ վեց հոգանոց խումբ էլ այդ նույն րոպեներին արգելափակել էր Յունուսի բնակարանը, որտեղ այդ պահին գտնվում էր նրա ամուսինը, հայտնի քաղաքագետ Արիֆ Յունուսը: Հատուկ գործողության ավարտին, երբ Յունուսն ի վերջո կարողացավ դուրս գալ տանից, նա որոշ պարզաբանումներ տվեց դեպքի վայր ժամանած լրագրողներին:
«Առավոտվանից Գլխավոր դատախազության աշխատակիցները փորձում են կոտրել մեր տան դուռը: Այս պահին Լեյլա Յունուսը Գլխավոր դատախազությունում է, որտեղ նրան հարցաքննում են: Փաստաբան Խալիդ Բաղիրովին արգելվել է մասնակցել քննչական գործողություններին: Հարցաքննությունն ի դեպ վարում է քննիչ Իբրահիմ Լեմբերանսկին: Սա այն նույն քննիչն է, որի վարույթում է գտնվում [«Զերկալո» թերթի լրագրող] Ռաուֆ Միրկադիրովի դեմ հարուցված քրեական գործը: Չեմ բացառում, որ ինչպես և Միրկադիրովին, մեզ էլ ձերբակալեն»,- հայտարարեց Յունուսը` փաստաբանի ուղեկցությամբ մեկնելով Դատախազություն:
«Ես պատրաստվում եմ հանձնվել»,- հայտարարեց քաղաքագետը` մտնելով Գլխավոր դատախազության շենք:
Ամբողջական հոդվածը կարող եք կարդալ այս հասցեով՝ http://www.azatutyun.am/
