ՀՀ աշխատանքի և սոցիալական հարցերի նախարար Մեսրոպ Առաքելյանը տեղեկացրել է, որ Արցախ այցի շրջանակներում հանդիպոլ է Արցախի Հանրապետության նախագահ Արայիկ Հարությունյանի հետ։
«Հանդիպման ընթացքում քննարկեցինք արցախահայության սոցիալական ծրագրերի ընթացքը, դրանց շարունակականության, նոր ծրագրերի անհրաժեշտությունը։
Վերահաստատեցի կառավարության հանձնառությունը՝ արցախցիների սոցիալական խնդիրների լուծմանն ուղղված ծրագրերը՝ որպես ընթացիկ առաջնահերթություն ամրագրելը։
Միևնույն ժամանակ, կարևորեցի Հայաստանում իրենց կեցությունը շարունակող արցախցիների նկատմամբ մեր պատասխանատվությունը, որոնք արտացոլված են մի շարք ծրագրերում։
Քննարկեցինք նաև Արցախի սոցիալ-տնտեսական ակտիվության վերականգնմանն ուղղված կայուն զարգացման հնարավոր ծրագրերը։
Մեր նախարարությունը ամենօրյա կապի մեջ է Արցախի կառավարության գործընկերների հետ՝ միջոցառումները ավելի արդյունավետ դարձնելու նպատակով»,- նշել է Առաքելյանը իր ֆեյսբուքյան գրառման մեջ:
