Հասարակական գործիչ Արսեն Խառատյանը արձագանելով ղարաբաղյան բանակցությունների մասին ռուսաստանցի համանախագահ Իգոր Պոպովի հոդվածին, իր ֆեյսբուքյան էջում գրել է․
«Գաղտնազերծել բանակցային բոլոր փաստաթղթերը, կամ` լռելԱրցախյան կարգավորման ԵԱՀԿ Մինսկի խմբի ռուսաստանցի համանախագահ Իգոր Պոպովը ՌԴ ԱԳՆ-ի պաշտոնական կայքի միջոցով արձագանքել է Նիկոլ Փաշինյանի կողմից` ՀՀ Վարչապետի պաշտոնական կայքում հրապարակած հոդվածին:
Պոպովը պնդում է, թե Փաշինյանը փաստեր է խեղաթյուրում` մանրամասներ ներկայացնելով ընդհուպ մինչեւ 2019-ի հունիս ամսին կողմերին ներկայացված առաջարկությունների վերաբերյալ: Մի կողմ թողնենք ռուսաստանցի դիվանագետի մոտիվներն ու դրա էթիկական հատվածը. Ի՞նչ պետք է անենք մենք:Ինչպես գիտենք, 1994-ից ի վեր, արցախյան բանակցային ողջ գործընթացը վարվել է գաղտնիության սկզբունքով:
Դրանց որոշ հատվածներ ոչ պաշտոնական խողովակներով հրապարակվել, կամ` գաղտնազերծվել են ներկա ու նախկին պաշտոնյաների, Մինսկի խմբի համանախագահների, փորձագետների ու լրագրողների կողմից: Արցախյան բանակցային գործընթացը` Քի Վեսթից մինչեւ Մադրիդյան սկզբունքներ, Կազանի փաստաթուղթ եւ անդին, տարբեր փուլերում իր մի շարք հոդվածներում հրապարակել է իմ գործընկեր Tatul Hakobyan-ը` ANI Armenian Research Center կայքում, սակայն դրանք երբեք պաշտոնական փաստաթղթեր չեն եղել:
Իրենց պաշտոնավարման ընթացքի բանակցային տվյալներ են հրապարակել արտգործնախարարներ Վարդան Օսկանյանն ու Էդուարդ Նալբանդյանը, մինչդեռ 90-ականների բանակցությունների մանրամասնություններին մեծամասամբ առնչվում ենք պրոֆեսոր Ժիրայր Լիպարիտյանի եւ առաջին նախագահ Լեւոն Տեր-Պետրոսյանի մենագրությունների, հոդվածների, հարցազրույցների ու ելույթների միջոցով: Ցավոք, սակայն, այս մասով եւս բնօրինակները սակավաթիվ են:
Հաշվի առնելով ստեղծված նոր իրողությունները, թերեւս ժամանակն է հրապարակել նախորդ 26 տարիների բանակցային փաստաթղթերի բնօրինակների ողջ փաթեթը, որոնք պետք է գտնվեն գործող քաղաքական մեծամասնության տնօրինության ներքո:
Այսպիսով, նախ` հստակեցումներ կմտցվեն ներհայաստանյան հանրային-քաղաքական դաշտում, եւ ապա կկանխվեն ապագայի ներքին ու արտաքին հնարավոր նոր շահարկումները: Մեր երկրի ու ժողովրդի համար այս լրջագույն մարտահրավերների շրջանում գործող պետական բարձրաստիճան պաշտոնյաները պետք է հասկանան, որ կամ` ամբողջական ծավալով լույս են սփռում անցյալի անգամ ամենածանր իրողությունների վերաբերյալ, կամ` դադարեցնում են մասնակի ներկայացնել պաշտոնական փաստաթղթերը, որոնք խորացնում են ճգնաժամն ու ավելացնում վտանգները»:
