Անհետ կորած զինծառայողների հարազատներն այս պահին հանդիպում են Ազգային անվտանգության ծառայության տնօրեն Արմեն Աբազյանի հետ։ Մինչ այդ նրանք մոտ մեկ ժամ բողոքի ակցիա էին իրականացնում ԱԱԾ շենքի դիմաց, գրում է Factor.am-ը։
Այնուհետ ակցիայի մասնակիցները ներս մտան շենք՝ հայտարարելով՝ դուրս չեն գա, մինչև չհանդիպեն Աբազյանի հետ:
«Ամեն անգամ մեզ խոստանում են՝ գնացեք, ամեն ինչ կանենք, բայց՝ անօգուտ: Վերջին անգամ ԱԱԾ-ից մեզ պատասխանել էին, որ մինչև ամսի 15-ը սպասեք, հաստատ պատասխան կունենանք, 4 օր անցել է՝ ոչ մի պատասխան չկա»,-ասաց հարազատներից մեկը։
Զինծառայողների հարազատները պատմում են, որ իրենք Արցախի ԱԻՊԾ-ի և Կարմիր խաչի հետ համատեղ մասնակցել են որոնողական աշխատանքներին: Որոնողական աշխատանքների արդյունքում 21 անհետ կորած զինվորներից միայն 9-ի մարմիններն են գտնվել, նրանցից 8-ն են նույնականացվել. Մինչ ներս մտնելը հարազատները հայտնեցին՝ եթե Աբազյանի հետ հանդիպումից գոհ չմնան, կշարունակեն բողոքի ակցիան և չեն հեռանա ԱԱԾ-ից։
