Ռուբինյանն ընդդիմադիրներին առաջարկում է վարչապետի հետ փակ քննարկում անցկացնել

Ազգային ժողովի նախագահի տեղակալ Ռուբեն Ռուբինյանը այսօր խորհրդարանի արտահերթ նիստում տեղեկացրել է, թե «Հայաստան» և «Պատիվ ունեմ» խմբակցությունների գործընկերներին առաջարկել է վարչապետ Նիկոլ Փաշինյանի մասնակցությամբ փակ աշխատանքային քննարկում կազմակերպել Ազգային ժողովի խորհրդի ֆորմատով, որում կքննարկվեն երկրի անվտանգային հարցերը:

«Երեկ «Հայաստան» խմբակցության գործընկերների հետ քննարկումների արդյունքում, նաև քննարկելով վարչապետի հետ, ես «Հայաստան» խմբակցությանը առաջարկել եմ կազմակերպել փակ աշխատանքային քննարկում վարչապետի և ընդդիմադիր խմբակցությունների մասնակցությամբ: Մեր ընդդիմադիր գործընկերներն ինձ ասել են, որ այդ ձևաչափն այդքան էլ ընդունելի չէ:

Կրկին վարչապետի հետ քննարկելո՝ ես արել եմ երկրորդ առաջարկը` կազմակերպել փակ աշխատանքային քննարկում Ազգային ժողովի խորհրդի ձևաչափով, որում ներառված են նաև ընդդիմադիր գործընկերները երկու խմբակցություններից: Ոչ դրական, ոչ բացասական պատասխան այս պահի դրությամբ չեմ լսել»,- ներկայացրել է Ռուբեն Ռուբինյանը:

Ռուբինյանը համաձայն է` կան հրատապ քննարկման հարցեր և առաջարկում է այդ հրատապ հարցերը քննարկել առաջարկված ֆորմատով:

«Ակնկալում եմ ձեր պատասխանը»,- դիմելով ընդդիմադիրներին, նշել է Ռուբինյանը: