Հունիսի 29-ին «Շենգավիթ» ԲԿ-ում մանկաբարձ-գինեկոլոգ Անի Սիրունյանի ջանքերով լույս աշխարհ է եկել 44-օրյա պատերազմում զոհված Հարութ Հովհաննիսյանի քույրը՝ Նարեն։ Այդ մասին հայտնում են «Շենգավիթ» ԲԿ-ից:
Երեխային Նարե անվանակոչելու մասին որոշումը հուզիչ նախապատմություն ունի։
««Փոքրիկի եղբոր սիրելի երգն էր «Նեմրա» խմբի «Նարեն», համակուրսեցիները ծնողներին պատմել են, որ նա միշտ ականջակալներով լսում էր երգը ու բանակ գնալուց առաջ էլ խնդրել էր իր համար Նարե գտնել մինչև զորացրվի։
«Ու էդպես չգտավ ինքը իր Նարեին… քույրիկ Նարե եկավ»,- պատմել է Հարութի մայրը՝ Նատալյա Դավթյանը։
Մոր համար հղիությունն անսպասելի է եղել, սկզբում մտածել է, թե վատ ինքնազգացողության պատճառն առողջական խնդիրներն են:
«Երբ Հարութը փոքր էր, հայրն ասում էր՝ ուշ ա, գնացեք քնեք, առավոտյան դասի եք, ինքն ասում էր՝ ախր, մարդ էլ կյանքից, ժամանակից կտրամադրի՞ քնելու համար… չգիտեր, որ հավերժ քնելու է»,- ծնողի խոսքն է մեջբերում ԲԿ-ն:
