Ընդդիմություն-իշխանություն երկխոսության համար ստեղծված կոալիցիայի աշխատանքային խմբի ղեկավար Դավիթ Հարությունյանը այսօր լրագրողների հետ զրույցում նշեց, որ իրենց երկրորդ հանդիպման ժամանակ որոշվել է բանակցությունների օրակարգը, ըստ որի, «քննարկման ենթակա է հարցը, որը ներկայացրել է Կոնգրեսը` առանց որեւէ խմբագրման եւ փոփոխության, եւ քննարկման ենթակա է այն հարցը, որը ներկայացրել է մեր աշխատանքային խումբը»:
«Մեր հիմնական առաջարկությունը հետեւյալն է, քաղաքակիրթ մրցակցության կանոններ պետք է ձեւավորվեն, որոնք պետք է լինեն կուսակցությունների համար: Այսինքն, քաղաքական դաշտի բոլոր մասնակիցները հնարավորություն պետք է ունենան ստորագրել այդ կանոնների տակ` կամովին ստանձնելով այդ պարտականությունները, որպեսզի մեր դաշտում քաղաքական մրցակցությունը լինի իրապես քաղաքակիրթ»,- հայտարարեց Հարությունյանը:
Բացատրելով, թե ինչու է իշխող կոալիցիայի աշխատանքային խումբը համաձայնել քննարկել արտահերթ ընտրությունների հարցը, Հարությունյանը նշեց, թե «շատ տարօրինակ կլիներ, եթե կողմերից մեկը հենց սկզբից ասեր` ես եկել եմ որոշակի սահմանափակումներով»:
«Մենք ասել ենք` մենք պատրաստ ենք քննարկելու ցանկացած հարց: Եւ իսկապես մենք պատրաստ ենք քննարկելու: Հակառակ դեպքում, դա այլեւս երկխոսություն չէ: Մենք ինչպես եւ հայտարարել ենք` պատրաստ ենք քննարկելու ցանկացած` անգամ ամենասուր հարցը»,- նշեց Հարությունյանը:
Լրագրողների հարցին, թե ինքը մինչ այդ հայտարարել է, թե բացառում է արտահերթ ընտրությունների անցկացումը, Հարությունյանը արձագանքել է. «Ես երբեք չեմ ասել բացառել բառը: Ես ասել եմ, որ ես այս պահին որեւէ հիմք չեմ տեսնում արտահերթ ընտրությունների անցկացման համար, բայց դրա համար է երկխոսությունը, որպեսզի կողմերը առնվազն փոխանակեն իրենց տեսակետները, բերեն իրենց հիմնավորումները, եւ մենք փորձենք հասկանալ յուրաքանչյուրս մյուս կողմի հիմնավորումները»:
© Medialab.am
