ՀՀ արդարադատության նախարար Հրայր Թովմասյանը հյուրընկալել է Հայաստանում Մեծ Բրիտանիայի արտակարգ եւ լիազոր դեսպան Չարլզ Լոնսդեյլին:
Հանդիպման առիթը Մեծ Բրիտանիայի հասարակական կազմակերպությունների գործունեության մասին օրենսդրության փոփոխությունը ՀՀ արդարադատության նախարարին ներկայացնելն էր:
Դեսպան Չարլզ Լոնսդեյլը նախարար Թովմասյանին իրազեկել է որ նշված փոփոխությունը վերաբերում է ինչպես իրենց երկրից դուրս գործող բրիտանական, այնպես էլ Մեծ Բրիտանիայում գործունեություն ծավալած տարբեր երկրների կազմակերպություններին:
Հանդիպման առիթն օգտագործելով՝ Մեծ Բրիտանիայի դեսպանը հետաքրքրվել է նաև, թե գործնական ինչ քայլեր են կատարվում Հայաստանում հատկապես կոռուպցիայի դեմ պայքարի ուղղությամբ:
Նախարար Հրայր Թովմասյանը, ըստ ՀՀ արդարադատության նախարարության պաշտոնական հաղորդագրության, ներկայացրել է, որ ներկա փուլում վերանայվում է օրենսդրությունը կոռուպցիոն ռիսկերը նվազեցնելու տեսանկյունից, օրենքները բեռնաթափելու և պարզեցնելու սկզբունքով:
ՀՀ կառավարությունը միջազգային փորձագետների աջակցությամբ իրականացնում է «գելիոտինի ծրագիրը»:
Նա տեղեկացրել է, որ օրենսդրական որոշակի փոփոխություններ արդեն կատարվել են, հնարավորինս նվազեցվել է «քաղաքացի չինովնիկ շփումը», մասնավորապես իրավաբանական անձանց պետական ռեգիստրի բնագավառում` մեկ պատուհանի սկզբունքը ներդնելով:
Ընդգծելով, որ «կոռուպցիան ազգային անվտանգության խնդիր է», և որ դա գիտակցելով այսօրվա քաղաքական իշխանությունը ձեռնարկում է անհրաժեշտ, այդ թվում՝ գործնական քայլեր, նախարար Թովմասյանը նշել է, որ չնայած դրան կան դեռևս խոցելի բնագավառներ, մասնավորապես կրթության, առողջապահության և դատական համակարգերում:
© Medialab.am