Եռաբլուր պանթեոն Սերժ Սարգսյանի եւ Կաթողիկոսի, ինչպես նաեւ այլ պաշտոնյաների եւ պատգամավորների այցի ժամանակ՝ Բանակի տոնի հետ կապված, հետաքրքիր իրավիճակ է ստեղծվել: Ինչպես հայտնում է Գալա հեռուստաընկերությունը, եւ ինչպես պարզ է տեսանյութից, Սերժ Սարգսյանին են մոտեցել կանայք, ովքեր լաց են եղել եւ դժգոհել են իրենց սոցիալական վիճակից ու այլ հարցերից:
«Ի՞նչ է եկել ես լացում ու տոնը խանգարում ես», զայրացած տոնով ասել է Սերժ Սարգսյանը կանանցից մեկին: Այդ ընթացքում փորձել է միջամտել նաեւ Սամվել Ալեքսանյանը, նախագահին հայտնելով, թե այդ կինը սուտ է խոսում եւ ինքը այդ կնոջը տալիս է աշխատելու հնարավորություն:
Լացող կանայք իսկապես փչացնում են տոնը: Ընդ որում տոնը ոչ միայն կոնկրետ, այլ նաեւ ընդհանրապես՝ կյանքի իմաստով: Այլ են օրինակ Չեբուրաշկաները: Օրինակ, թվում է, որ Սերժ Սարգսյանը լինելով մարդ, ով զբաղեցնում է նախագահի պաշտոնը եւ այն էլ գտնվում է նախընտրական արշավի փուլում, պետք է ուշադրությամբ լսեր լացող կանանց եւ զայրանար Չեբուրաշկաների վրա: Բայց հակառակն է՝ արտասվող կանանց նա հորդորում է չխանգարել տոնը, իսկ Չեբուրաշկաներին լսում մինչեւ վերջ:
Իսկ «Չեբուրաշկան» ելույթ էր ունենում Սերժ Սարգսյանի Դավիթաշենում տեղի ունեցած նախընտրական հավաքի ժամանակ, վեր կանգնելով եւ Սերժ Սարգսյանին դիմելով կիսառուսերեն-կիսահայերեն՝ «Шяс Чебурашка скажет вам речь…»:
Չեբուրաշկաները կյանքը տոն են դարձնում, իսկ լացող կանայք փչացնում են ամեն ինչ:
Լավ է գոնե, որ կան ամենափրկիչ օլիգարխները, որ միջամտում են ժամանակին: