Ազգային ժողովի պատգամավոր Արման Բաբաջանյանը իր ֆեյսբուքյան էջում գրել է.
«Ավազակապետական բուրգի համահիմնադիրը, պետությունը կազմաքանդողը, քրեաօլիգարխիայի պարագլուխն ու հայկական գողական աշխարհի պախանը գործող իշխանությանը մեղադրում է բանակը թալանելու մեջ:
Երիցս ճիշտ է անում:
Եթե հեղափոխական ուժը չի ընկալում իր պատասխանատվությունը պետության առջև և անցած 25-ամյա զավթված իշխանության իրողության վերաբերյալ իրավաքաղաքական գնահատական չի տալիս, մարդասպանը, թալանչին հանցագործը իրավունք ունի ասել ու հայտարարել՝ ինչ կուզի:
Մարդ, ով իշխանության է եկել փաստացի պատերազմում գտնվող բանակը Երևանի կենտրոնում խաղաղ ցուցարարներին սպանելու և հանրահավաքները թույլ չտալու միջոցով, ում պաշտոնավարման օրոք բանակում ամենաշատ ինքնասպանություններն են արձանագրվել, ով անձամբ է համակարգել և տնօրինել ողջ պետական համակարգի և հատկապես բանակի գնումներն ու ատկատները, ով փողով զինվորական կոչումներ է շնորհել, գողական բարքերն է խորացրել բանակում, ում պաշտոնավարման ընթացքում հարյուր հազարավոր մեր հայրենակիցներ արտագաղթել են, ով Հովիկ Աբրահամյանի նման կիսաքրեական հանցագործ անգրագետին նշանակել է ՀՀ վարչապետ, ով անձնապես բուծել է քրեաօլիգարխներ, նրանց տվել ԱԺ մանդատ, գործող կամազուրկ, անբան, անկյալ իշխանությանը մեղադրում է բանակը թալանելու մեջ»: