«ՀՀԿ-ն չպետք է շատ ուրախանա, ոչ թե որպես կուսակցություն է հաղթել, այլ իր ավանդական գործիքներով՝ համոզելով, կաշառելով, ճնշելով»․ Արթուր Սաքունց

11-10-2016
14646 դիտում
«ՀՀԿ-ն չպետք է շատ ուրախանա, ոչ թե որպես կուսակցություն է հաղթել, այլ իր ավանդական գործիքներով՝ համոզելով, կաշառելով, ճնշելով»․ Արթուր Սաքունց

Վանաձորի քաղաքապետի ընտրությունները ցույց տվեցին, որ կուսակցություններն ըստ էության կայացած չեն, ավելին, այնպիսի վիճակում են գտնվում, որ նույնիսկ իրենց անդամների անունից չեն կարող հանդես գալ: «Մեդիալաբի» հետ զրույցում նման դիտարկում արեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը՝ անդրադառնալով հոկտեմբերի 10-ին Վանաձորի ավագանու նիստին ու քաղաքապետի սկանդալային ընտրություններին:

Բուռն ու լարված մթնոլորոտում, երեկ Վանաձորում քաղաքապետ ընտրվեց ՀՀԿ թեկնածու Մամիկոն Ասլանյանը:

Ավագանու 33 անդամներից փակ գաղտնի քվեարկությամբ նրա օգտին քվեարկեցին 19, իսկ «Լուսավոր Հայաստան» կուսակցության թեկնածու Քրիստ Մարուքյանի օգտին՝ 14 անձ:

Նախքան ընտրությունները ԲՀԿ-ն, Հայկական վերածնունդը և «Լուսավոր Հայաստանը» հուշագիր էին ստորագրել, որ պետք է միասնական սատարեին Քրիստ Մարուքյանի թեկնածությունը: Այդ դեպքում հնարավոր կլիներ Մարուքյանի օգտին ունենալ 18 ձայն, իսկ ՀՀԿ թեկնածուի օգտին՝ 15, ինչը նշանակում էր, որ Վանաձորում իշխանությունն անցնելու էր ընդդիմությանը:

Բայց, ինչպես և սպասելի էր, հուշագիրն ստորագրած այս եռյակի անդամներից ոմանք քվեարկեցին ՀՀԿ թեկնածուի օգտին:

Վանաձորի քաղաքապետի ընտրություններն ուղեկցվեցին վեճով ու սկանդալներով: ԲՀԿ և Հայկական վերածնունդ կուսկացության անդամներին կուսակցությունների ղեկավարության կողմից հրահանգված էր քվեարկությունից հետո բջջային հեռախոսով լուսանկարել իրենց քվեաթերթիկները: Սակայն հաշվիչ հանձնաժողովը որոշում կայացրեց արգելել բջջային հեռախոսներով քվեարկությանը մասնակցելը:

ԲՀԿ նախագահ Նաիրա Զոհրաբյանը ընտրություններից հետո հայտարարել է, որ Վանաձորի ավագանում ԲՀԿ-ական բոլոր 3 անդամները կողմ են քվեարկել Քրիստ Մարուքյանի թեկնածությանը: «Հայկական վերածնունդի» անդամ Հեղինե Բիշարյանը նույնպես հայտարարել էր, որ վստահ է՝ իրենց 5 անդամներն էլ պահպանել են հուշագրի կետերն ու կողմ քվեարկել «Լուսավոր Հայաստանի» թեկնածուի օգտին: Լուսավոր Հայաստանի առաջնորդ Էդմոն Մարուքյանն ասում է, որ սպասելի էր այս արդյունքը, և որ շուտով հայտնի կդառնա, թե ավագանու որ անդամները չեն պահել իրենց խոստումը:

«Ըստ էության, սա խոսում է այն մասին, որ ճիշտ է, փոխվեց ավագանու կազմավորման սկզբունքը, այսինքն՝ մեծամասնականից դարձավ համամասնական, բայց դա միայն ձևով է համամասնական, իրականում բովանդակությամբ դա մեծամասնական ընտրություն էր, քանի որ առանձին կուսակցություններ իրենց թեկնածուների շարքում ընդգրկեցին տեղերում հեղինակություն ունեցող անձանց, որոնք հանդես եկան այդ կուսակցությունների անվան տակ: Իսկ դա վճռորոշ նշանակություն ունեցավ ոչ միայն քվեարկության արդյունքների վրա»,- «Մեդիալաբին» ասում է Արթուր Սաքունցը:

Նա նշում է, որ այս ցանկում բացառություն է կազմում «Լուսավոր Հայաստանը», որը իրոք քաղաքական թիմ է: Իսկ ՀՀԿ-ն, որը թեև թիմ է հանդես գալիս, բայց բոլորովին այլ հիմքերով է ձևավորված, հենված է վարչական ռեսուրսների վրա:

Պաշտոններ զբաղեցնող մարզային և համայնքային ենթակայության ձեռնարկությունների ղեկավարների, մարզային իշխանության ներկայացուցիչեր հանդիսացող մարդկանց խումբ է ՀՀԿ-ն, որի անդամներն, ըստ Սաքունցի, շաղկապված են այդ պաշտոնները պահելու, ոչ թե քաղաքական կամ կուսակցական շահերով:

«Իսկ մնացածներին որպես կուսակցական թիմեր անվանել չենք կարող: Դա դրսևորվեց նաև այս պայմանավորվածությունների կատարման ժամանակ: Բովանդակությամբ մեծամասնական այս ընտրություններում, բնականաբար, այս անձնական գործոնները և անձերի հետ պայմանավորվածությունները շատ ավելի որոշիչ նշանակություն պետք է ունանային, քան կուսակցությունների մեջ ձեռք բերված համաձայնությունները: Սա խոսում է այն մասին, որ համայնքներում կուսակցությունները՝ որպես տեղական մակարդակում քաղաքականություն իրականացնող ուժեր, դեռևս կայացած չեն»,- ասում է նա:

Ըստ Սաքունցի՝ այսինքն՝ կուսակցությունները դեռևս ունեն անելիքներ կայանալու առումով:

Մյուս կողմից, նրա խոսքով, «ՀՀԿ-ն չպետք է շատ ուրախանա այդ արդյունքներով, որովհետև պետք է գիտակցի, որ ինքը ոչ թե որպես կուսակցություն է հաղթել, այլ իր ավանդական գործիքներով՝ համոզելով, կաշառելով, ճնշելով»:

«Այդ գործիքներն են աշխատել, ոչ թե կուսակացությունն է հաղթել: Միանշանակ է, որ քվեարկության արդյունքներով ՀՀԿ-ն չի ստացել ձայների մեծամասնությունը, չնայած բոլոր այն խախտումներին, որոնք գրանցվեցին թե նախընտրական քարոզչության ժամանակ, թե քվերակության օրը: Եվ դա ես համարում եմ Պյուռոսյան հաղթանակ»,- նշում է Սքունցը:

Նրա խոսքով՝ միայն վարչական ռեսուրսների հիման վրա որպես կուսակցություն հանդես գալը շատ խոցելի է, դա պարզապես իշխանության ռեսուրսների, իրավապահ մարմինների, տարբեր անձնական շահերի հիման վրա և պայմանավորվածությունների արդյունքում ձեռք բերված արդյունք է:Եվ կուսակցությունների՝ ավագանիում իրականացրած քվեարկությունը չարդարացրեց վանաձորցիների սպասելիքը:

Էմմա Մանուկյան

MediaLab.am