ԱզգայինժողովիՀՅԴ խմբակցության ղեկավար Արմեն Ռուստամյանը արդարադատության նախարար Հրայր Թովմասյանին այսօր «չաթլախ»անվանեց:
Հիշեցնենք, որ ԱԺ ոչ իշխանական չորս ուժերի՝ կառավարությանն անվստահություն հայտնելու հարցին անդրադառնալով՝ Հրայր Թովմասյանն օրերս ասել էր, թե ոչ իշխանական ուժերը ղալաթ են անում:
«Սա աննախադեպ երևույթ է, որ արդարադատության նախարարը փոխանակ Սահմանադրությունը հարգի ու պահպանի, չի պահպանում սահմանադրական նորմերը: Այս ոչ իշխանական չորս ուժերն խորհրդարանում ունեն 53 պատգամավոր: Սա անարգանք է՝ ուղղված Ազգային ժողովին ու պատգամավորների թիկունքում կանգնած ժողովրդին»,- ասաց նա:
Արմեն Ռուստամյանը նշեց, որ փոխանակ Հրայր Թովմասյանն ասի, թե սխալվել է, լեզվի սայթաքում է արել, էլ ավելի է խորացնում իրավիճակը՝ հայտարարելով, թե «ղալաթ» բառն արաբերան նշանակում է սխալ անել:
«Բառարանային բառերի հետևից եթե ընկնենք ու մենք իրեն հիմա ասենք՝ ղալաթ ես անում չաթլախ, չնեղանաք»,- ասաց Ռուստամյանը:
Նրա այս արտահայտությունը պատգամավորների շրջանում ծիծաղ առաջացրեց,
ԱԺ դահլիճում աղմուկ բարձրացավ:
Ազգային ժողովի նախագահ Հովիկ Աբրահամյանը փորձում էր զսպել պատգամավորներին:
«Ցավում եմ, որ նման ձևակերպումներ են լինում: Չեմ հասկանում` ինչո՞ւ տրամադրություններդ միանգամից բարձրացավ: Ես զարմացած եմ ձեր պատասխանից պարոն Ռուստամյան»,- ասաց Հովիկ Աբրահամյանը:
Լրագրողների հարցին ի պատասխան Արմեն Ռուստամյանը նշեց, որ «չաթլախ» բառը տաջիկերեն նշանակում է «ճաք տված», թող Հրայր Թովմասյանն էլ բառարան նայի:
«Եթե նա կարծում է, որ մենք բառարանային բառերին չենք տիրապետում, չարաչար սխալվում է»,- ասաց Արմեն Ռուստամյանը:
© Medialab.am