FIP.am-ը գրում է.
ՍԽԱԼ
ՊՊԾ-ն պետք է դադարեցրած լիներ ՀՀ նախկին վարչապետ Նիկոլ Փաշինյանի և նրա ընտանիքի անդամների պահպանությունը. Էդգար Ղազարյան
Սահմանադրական դատարանի աշխատակազմի նախկին ղեկավար, ՀՀԿ-ական Էդգար Ղազարյանը ապրիլի 25-ին ֆեյսբուքյան իր էջում գրառում էր կատարել՝ հայտարարելով, որ Նիկոլ Փաշինյանը հրաժարական ներկայացնելուց հետո չի կարող օգտվել ԱԱԾ պետական պահպանության ծառայությունից։
«ՀՀ ԱԱԾ պետական պահպանության ծառայությունն այսօր կեսօրից պետք է դադարեցրած լիներ ՀՀ նախկին վարչապետ Նիկոլ Փաշինյանի և նրա ընտանիքի անդամների պահպանությունը»,- գրել էր նա։
Նրա գրառումն արտատպել էին 168.am, live24.am և այլ կայքեր։
«Փաստերի ստուգման հարթակը» ուսումնասիրեց համապատասխան օրենքը՝ Ղազարյանի պնդումը ստուգելու համար։
«Հատուկ պետական պաշտպանության ենթակա անձանց անվտանգության ապահովման մասին» օրենքի 5-րդ հոդվածով, որով սահմանվում են պետական պահպանության օբյեկտները, նշվում է, որ հանրապետության նախագահը, վարչապետը և Ազգային ժողովի նախագահը՝ իրենց պաշտոնավարման ժամանակահատվածում, իսկ վարչապետի թեկնածուն՝ մինչև վարչապետ նշանակելու հարցի լուծումը, իրավասու չեն հրաժարվելու պետական պահպանությունից։
Նույն օրենքի 6.1 հոդվածի 3-րդ մասը ամրագրում է, որ «Վարչապետի պաշտոնավարման ժամանակահատվածում պետական պահպանություն տրամադրվում է նաև նրա հետ համատեղ բնակվող, ինչպես նաև նրան ուղեկցող ընտանիքի անդամներին»:
Փաստացի, Փաշինյանը, լինելով վարչապետի ժամանակավոր պաշտոնակատար, շարունակում է պաշտոնավարել, ինչն էլ ենթադրում է, որ թե՜ ինքը և թե՜ իր ընտանիքի անդամները պետք է ստանան պետական պահպանություն, իսկ ինքը՝ վարչապետը, նույնիսկ չի կարող հրաժարվել դրանից:
Բացի այդ, նույն օրենքի 6.1 հոդվածի 4-րդ մասով, որը վերաբերում է վարչապետի պետական պահպանությանը, սահմանվում է, որ պաշտոնաթող վարչապետներին տրամադրվում է անձնական ցմահ պետական պահպանություն: Այսինքն՝ եթե Նիկոլ Փաշինյանը, այնուամենայնիվ, չշարունակեր պաշտոնավարել, միևնույն է՝ նրան պետք է տրամադրվեր պետական պահպանություն։
Ավելին, արդեն հայտարարվել է, որ «Իմ քայլը» խմբակցությունը Նիկոլ Փաշինյանին առաջադրելու է վարչապետի պաշտոնում: Հետևապես, անկախ Նիկոլ Փաշինյանի՝ վարչապետի պաշտոնակատար լինել-չլինելուց, իրեն, որպես վարչապետի թեկնածուի, ևս հասնում է պարտադիր պետական պահպանություն՝ առանց հրաժարվելու իրավունքի:
Հիշեցնենք, որ ապրիլի 25-ին Նիկոլ Փաշինյանի ղեկավարած կառավարությունը տվեց հրաժարական, քանի որ արտահերթ ընտրություններ անցկացնելու միակ սահմանադրական ճանապարհն է կառավարության հրաժարականը ու դրան հաջորդող՝ ԱԺ-ում վարչապետի ընտրության երկու չհաջողված փորձերից հետո խորհրդարանի արձակումը:
«Փաստերի ստուգման հարթակը» արդեն անդրադարձել էր այն հանգամանքին, թե արդյո՞ք վարչապետն ու կառավարության մյուս անդամները պետք է շարունակեն պաշտոնավարել կառավարության հրաժարականից հետո:
