Քաղաքական մեկնաբան Հակոբ Բադալյանը ֆեյսբուքյան իր էջում գրում է․
«Թալիբների հետ փորձում են պայմանավորվել բոլոր ռեգիոնալ պետությունները, որոնք կարող են ունենալ Աֆղանստանում նրանց իշխանության հաստատմամբ պայմանավորված կապված խնդիրներ: Չինաստան, Իրան, Թուրքիա, Ռուսաստան: Ու սա էն դեպքում, երբ Թալիբները շարունակում են միջազգայնորեն դիտվել ահաբեկչական կազմակերպություն:
Նրանց հետ Դոհայում քննարկումների մեջ են ամերիկացիները: Այդ ամենը սակայն չի կարող զարմանալի լինել միջազգային քաղաքականության, կամ պարզապես քաղաքականության համարժեք ընկալման պայմաններում: Խնդիրը քաղաքականության բարոյական կամ անբարոյական լինելը չէ, երբ հաճախ հնչում է այդ բանալ գնահատականը:
Բանն այն է, որ քաղաքականությունը խնդիրներ լուծելու գործունեության դաշտ է, եւ գործողությունները պայմանավորվում են լոկ ձեւակերպված խնդիրների լուծման անհրաժեշտությունից բխող տրամաբանությամբ:
Ու թալիբների հետ քննարկումների օրինակը նաեւ մեզ համար խիստ ընդգծում է պարզ հանգամանք՝ քո իսկ քաղաքականության արդյունավետության համար, անգամ թշնամի դիտարկվող սուբյեկտի հետ ուղիղ խոսակցության հնարավորության, ուղիղ խոսակցության կոմունիկացիայի կարեւորությունն ու անհրաժեշտությունը»: