103-ամյա Թագուհի Իսպիրյանը 7 զավակ, 70 թոռ ու ծոռ և երկու կոռ ունի

Տարեցների միջազգային օրվա առթիվ Գեղարքունիքի մարզպետ Կարեն Սարգսյանն այցելեց և անձամբ շնորհավորեց Հացառատ թաղամասից 103-ամյա Թագուհի Իսպիրյանին՝ Գավառի տարածաշրջանի ամենատարեց բնակչին:

Մարզպետարանից հայտնում են, որ Կարեն Սարգսյանը շնորհավորեց Թագուհի տատիկին և օրվա առթիվ պարգևատրեց դրամով: Զրուցելով մարզպետի հետ տիկին Թագուհին նշեց, որ ինքը ծնունդով Հացառատ թաղամասից է, ունի 7 զավակ, 70 թոռ ու ծոռ և երկու կոռ:

Տատիկին անհանգստացնող հիմնական խնդիրը կապված է տեսողության հետ, որի կարգավորման համար մարզպետ Կարեն Սարգսյանը հանձնարարեց մարզպետարանի առողջապահության և սոցիալական ապահովության վարչության ներկայացուցչին՝ միջամտություն ցուցաբերել և աջակցել բուժման կազմակերպման հարցում:

Թագուհի Իսպիրյանի և նրա զավակների հետ մարզպետի ունեցած զրույցի ընթացքում պարզ դարձավ, որ ընտանիքի թոռը՝ Գավառ քաղաքի Հացառատ թաղամասից զինծառայության զորակոչված Արտյոմ Հակոբի Մկրտչյանը, անմիջական մասնակցությունն է ունեցել 2020 թվականի Արցախյան պատերազմի ընթացքում և նոյեմբերի 25-ին ընկել է հերոսի մահով՝ կյանքը զոհաբերելով հայրենիքի համար:

Մարզպետ Կարեն Սարգսյանը զորակցությունը հայտնեց հերոսի հարազատներին՝ կիսելով կորստյան ծանր վիշտը և պատրաստակամություն ցուցաբերեց՝ իր լիազորությունների շրջանակներում աջակցել ընտանիքի անդամներին՝ որոշ խնդիրների կարգավորման հարցում: