Կառավարությունն անըդնունելի է համարում ընդդիմադիր պատգամավորների այն պնդումները, որ Հայաստանում քաղաքական զարգացումներով պայմանավորված արտակարգ դրության ժամանակ բանակի ուժերը, զենքն ու տեխնիկան չպետք է օգտագործվեն:
ԱԺ ՀԱԿ խմբակցության պատգամավորների` «Արտակարգ դրության իրավական ռեժիմի մասին» օրենքում առաջարկած փոփոխություններն ու լրացումները կառավարությունն այսօրվա նիստում մերժեց:
Պատգամավորներ Ստեփան Դեմիրճյանը, Արամ Մանուկյանը, Նիկոլ Փաշինյանը, Լյուդմիլա Սարգսյանը, Գագիկ Ջհանգիրյանը, Լևոն Զուրաբյանը և Հրանտ Բագրատյանը «Արտակարգ դրության իրավական ռեժիմի մասին» օրենքի նախագիծ էին ներկայացրել կառավարություն, որով առաջարկվում է բանակի ուժերն օգտագործել միան բնական, տարերային ու տեխնոգեն աղետներով պայմանավորված արտակարգ դրության ժամանակ:
Արդարադատության նախարար Հրայր Թովմասյանը կառավարության այսօրվա նիստում հայտարարեց, որ այդ առաջարկը կառավարության համար անընդունելի է, քանի որ.
«Արտակարգ դրությունը չի սահմանափակվում միայն բնական, տարերային ու տեխնոգեն աղետներով, քանի որ այն իր մեջ ներառում է նաև Հայաստանի Հանրապետության սահմանադրական կարգը բռնությամբ փոփոխելու կամ տապալելու, իշխանությունը զավթելու փորձերը, զինված խռովությունները, զանգվածային անկարգությունները, բռնի գործողություններով ուղեկցվող ազգային, ռասայական, կրոնական հակամարտությունները, ահաբեկչական ակտերը, հատուկ նշանակության օբյեկտների գրավումը կամ շրջափակումը, անօրինական զինված միավորումների ստեղծումը և գործունեությունը»:
Նախարարը հիշեցրեց, որ ՀՀ Սահմանադրության 55-րդ հոդվածի14-րդ կետում ուղղակիորեն սահմանվում է ՀՀ նախագահի լիազորությունը՝ սահմանադրական կարգին սպառնացող անմիջական վտանգի դեպքում, խորհրդակցելով Ազգային ժողովի նախագահի և վարչապետի հետ, երկրում հայտարարել արտակարգ դրություն, իրականացնել իրավիճակից թելադրվող միջոցառումներ և այդ մասին ուղերձով դիմել ժողովրդին:
«Հայաստանի Հանրապետության զինված ուժերը կարող են օգտագործվել ինչպես Հանրապետության վրա զինված հարձակման, դրա անմիջական վտանգի առկայության կամ հայտարարված պատերազմի և ռազմական դրություն հայտարարելու դեպքում, այնպես էլ արտակարգ դրություն հայտարարելու դեպքում:
Ընդ որում, արտակարգ դրություն հայտարարելու դեպքում ՀՀ պաշտպանության պետական լիազոր մարմնի մարդկային ռեսուրսները, տեխնիկական և տրանսպորտային միջոցները կարող են օգտագործվել նաև զենքով և զինամթերքով»,- նշվում է կառավարության հիմնավորման մեջ:
Արդարադատության նախարար Հրայր Թովմասյանը կառավարությունում լրագրողների հարցին ի պատասխան ասաց, որ չպետք է արտակարգ դրությունը շփոթել հանրահավաքների հետ:
«Արտակարգ դրությունը շատ ավելի խորը բան է, և Աստված չանի, որ Հայաստանում երբևէ նորից արտակարգ դրություն լինի»,- ասաց նա:
Ըստ նախարարի՝ ոստիկանական ուժերից բացի կան նաև զինված ուժեր, որոնք նույնպես պետք է օգտագործել արտակարգ դրության ժամանակ:
© Medialab.am
