Այսօր ամբողջ աշխարհում նշվում է Դաունի համախտանիշ ունեցող երեխաների օրը` 2006 թվականին հույն գենետիկ Ստիլիանոս Անտոնարակիսի կողմից ներկայացված առաջարկի հիման վրա: Օրը պատահական չէ ընտրվել երրորդ ամսվա քսանմեկերորդ օրը, քանի որ Դաունի համախտանիշը կապված է 21-րդ քրոմոսոմի 3-րդ տրիսոմիայով՝ (տրիսոմիա 21)։
Այդ մասին հայտնում են Առողջապահության նախարարությունից։
Վիճակագրական տվյալների համաձայն՝ 700–800 նորածիններից 1-ը ծնվում է Դաունի համախտանիշով։ Տարբեր երկրներում հանդիպելիության հարաբերակցությունը նմանատիպ է և կախված չէ սննդից, կրթության մակարդակից, ազգությունից և ծնողների կենսակերպից, մոր տարիքի (35 և ավելի) հետ մեկտեղ մեծանում է Դաունի համախտանիշով երեխայի ծնվելու ռիսկը։
Մեր երկրում իրականացվում են մի շարք սկրինինգային ծրագրեր, որոնց նպատակն է հիվանդությունների և/կամ համախտանիշների վաղ ախտորոշումը, հնարավորության դեպքում բուժումը և բարդությունների կանխարգելումը։
Պետական պատվերի շրջանակում հղիության 11-14 շաբաթական ժամկետում կատարվում է ուլտրաձայնային հետազոտություն, որի արդյունքում հայտնաբերված շեղումների դեպքում, պտղի զարգացման արատների առումով ռիսկի խմբի (մեծահասակ հղիներ` 35 տարեկան և ավելի, ընտանիքում զարգացման բնածին արատ ունեցողներ) հղիների մոտ պտղի զարգացման արատների, հատկապես Դաունի համախտանիշի վաղ հայտնաբերման նպատակով իրականացվում է նաև կենսաքիմիական սկրինինգ՝ մարդկային խորիոնային գոնադոտրոպինի և PAPP-A որոշում։ Առավել ստույգ ախտորոշման համար անհրաժեշտ է հատուկ հետազոտություն՝ կարիոտիպի որոշում: Այս հետազոտությունը թույլ է տալիս հայտնաբերել ոչ միայն Դաունի համախտանիշի առկայությունը, այլև որոշել տրիսոմիա-21-ի տեսակը։
Դաունի համախտանիշով երեխաների աճն ու զարգացումը տարբերվում է և ունի որոշակի առանձնահատկություններ, որը հաշվի առնելով, առողջապահության նախարարությունը երեխայի հսկողության ամբուլատոր քարտի թվայնացման աշխատանքների ընթացքում նախատեսել է առանձնացնել Դաունի համախտանիշով երեխաների պերցենտիլային աճի քարտերը, ինչը կնպաստի որոշակի խնդիրների վաղ հայտնաբերմանն ու հնարավորության դեպքում կանխարգելմանը։
