Մինչ Եգիպտոսում արդեն գրեթե մեկ շաբաթ է շարունակվում են արյունալի բախումներով հակակառավարական ցույցերը` բազմաթիվ զոհերով եւ վիրավորներով, ՀՀԿ մամլո խոսնակ, ԱԺ պատգամավոր Էդուարդ Շարմազանովն այսօր հայտարարել է, թե այդ դեպքերը Հայաստանի համար չեն կարող նախադեպ հանդիսանալ:
«Հայաստանում կա դժգոհություն, բայց չկա նախապայման սոցիալական բունտի համար: Հայաստանի իշխանությունները վճռական են իրականացնել բարեփոխումներ հետճգնաժամյա հետևանքների բարելավման համար»,- լրագրողների հետ կայացած հանդիպման ժամանակ ասել է Էդուարդ Շարմազանովը:
Նա նշել է, որ իշխանությունների վճռականությունը բարեփոխումների առումով արտահայտվում է լրագրողների հետ բաց աշխատանքով, կոռուպցիայի դեմ պայքարով:
«Այս պահին իշխանությունները բավականաչափ բաց են աշխատում: Նակինում երբեք իշխանությունները այսքան բաց չեն եղել: Եթե որոշ մարդկանց անհրաժեշտ են ուժեղ ցնցումներ, մեզ անհրաժեշտ է ուժեղ Հայաստան»,-նշել է Շարմազանովը:
© Medialab.am
