Գյումրիում հազարավոր մարդիկ այսօր հրաժեշտ են տալիս դաժանորեն սպանված Ավետիսյանների ընտանիքի վեց անդամների, ովքեր սպանդի ենթարկվեցին հունվարի 12-ի վաղ առավոտյան:
Գյումրիի Մյասնիկյան փողոցի թիվ 188 տանը բնակվող Ավետիսյանների ընտանիքի վեց անդամները սպանվեցին դեռեւս անհայտ հանգամանքներում, ընտանիքի ամենափոքրը` վեց ամսական Սերյոժա Ավետիսյանը, ով հայտնաբերվեց կրծքի շրջանում ծակող գործիքով վնասված գտնվում է հիվանդանոցում` ծանր վիճակում: Բժիշկները պայքարում են երեխայի կյանքի համար:
Գյումրեցիների սպանության մեջ կասկածվողը Գյումրիի 102-րդ ռազմաբազայի զինծառայող ռուս զինվոր Վալերի Պերմյակովն է, ով խոստովանական ցուցմունք է տվել ներկայումս գտնվում է ռուսական կողմի մոտ:
Հայաստանում Ռուսաստանի դեսպան Իվան Վոլինկինը «Սպուտնիկ» ռադիոկայանի տված հարցազրույցում խոսելով Գյումրիում տեղի ունեցած արյունալի միջադեպի և դրան հաջորդած իրադարձությունների մասին՝ ասել է, որ հարցը չպետք է քաղաքականացնել:
«Ես հասկանում եմ այդ մարդկանց, նրանց զգացմունքները, որովհետև դաժան հանցագործություն է տեղի ունեցել, որի համար հանցագործը պետք է պատասխան տա: Մարդիկ իհարկե, իրավունք ունեն գալ այստեղ, իրենց կարծիքը, զգացմունքներն արտահայտելու: Բայց կարծում եմ, որ այս հարցը քաղաքականացնել պետք չէ: Մենք չպետք է քաղաքական հրդեհ բորբոքենք այս հարցի շուրջ: Կարծում եմ քննությունը կպարզի այս գործի բոլոր մանրամասները և հանցագործը համարժեք պատիժը կկրի», – նշել է նա:
Գյումրիում տեղի ունեցած արյունալի ողբերգությունը հազարավոր մարդկանց փողոց է հանել: Երեկ Գյումրիում տեղի ունեցած երթի ժամանակ ձվեր են թռչել Ռուսաստանի հյուպատոսարանի ուղղությամբ: Հազարավոր քաղաքացիներ, չնայած իրավապահների շղթաներին շարժվել են ռազմաբազայի ուղղությամբ` պահանջելով սպանդի մեջ մեղադրվողին ռուսական կողմից հանձնել հայ իրավապահներին:
Ցուցարարները այսօր մինչեւ ժամը հինգ ժամանակ են տվել դատախազությանը` խոստանալով Ավետիսյանների հուղարկավորման արարողությունից հետո վաղը` ժամը երեկոյան հինգին, կրկի հավաքվել: Ցուցարաները նշել են, որ իրենց հետագա քայլերը կախված են լինելու դատախազության պատասխանից:
Լուսանկարներն` այստեղ
© Medialab.am
