«Փուչիկների գործով» մեկ տարի ազատազրկման դատապարտված Սերոբ Բոզոյանի պատժի կրումը այսօր քրեական գործերով վերաքննիչ դատարանը փոխարինեց մեկ տարի պայմանական ազատազրկմամբ:
«Հուսով էի, որ դատարանը նման որոշում կընդունի և, փառք Աստծո, այժմ արդեն ընտանիքիս հետ կլինեմ, երեխաներիս կողքին»,- «Մեդիալաբին» ասում է Սերոբ Բոզոյանը:
Հիշեցնենք, որ 2012-ի մայիսի 4-ին ԱԺ ընտրություններին ՀՀԿ եզրափակիչ նախընտրական հանրահավաքի ժամանակ այրվել և պայթել էին երիտասարդների ձեռքում գտնվող հազարավոր փուչիկներ, որոնք լիցքավորված են եղել ոչ թե հելիումով, այլ մեթանով:
Պաշտոնական տվյալներով` առնվազն 155 մարդ տարբեր աստիճանի այրվածքներով տեղափոխվել էր Երևանի բուժհաստատություններ:
«Փուչիկների գործը» շատերի մեջ զուգորդվում է ՀՀԿ պատգամավոր Կարեն Ավագյանի հետ, ով ուղեկցում էր 7000 սպիտակ փուչիկները վեր պարզած, ոչնչից անտեղյակ երիտասարդներին: Ինչպես ավելի ուշ խոսել էր Սերոբ Բոզոյանի կինը` Մարինեն, «168 ժամ»-ին տված հարցազրույցում, Կարեն անունով մեկը «ստիպել» է ամուսնուն, որ փուչիկները մեթանով լիցքավորեն, քանի որ հելիումը թանկ է:
Սակայն դեպքի առնչությամբ մեղադրանք էր առաջադրվել միայն փուչիկները լիցքավորողին` Սերոբ Բոզոյանին` ՀՀ քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը) 2-րդ մասով (նույն արարքը, որն անզգուշությամբ վնաս է պատճառել երկու կամ ավելի անձանց առողջությանը):
Երկու անչափահաս երեխաների հայր Բոզոյանը, ով նաև քաղցկեղով հիվանդ է, առաջին ատյանի դատարանի որոշմամբ դատապարտվել էր մեկ տարի ազատազրկման:
Իսկ թե ի´նչն ազդեց այժմ վերաքննիչ դատարանում դատավճռի փոփոխության մեջ հարցին, Բոզոյանի փաստաբան Կարեն Մանուչարյանը նշում է` փաստարկները:
Մասնավորապես այն, ըստ փաստաբանի, որ Բոզոյանն ընդունել է իր մեղքը, տառապում է օնկոլոգիական հիվանդությամբ, իր խնամքի տակ ունի երկու անչափահաս երեխա և նախկինում դատապարտված չի եղել, բնութագրվում է դրական: Ինչպես նաև այն, որ ընդհանուր ատյանի դատավճռում հաշվի չեն առնվել ամբաստանյալի մի շարք նյութական և դատավարական իրավունքի նորմեր:
«Մեզ շատ ուրախացրեց դատարանի էս որոշումը, հիմա ես ընտանիքիս հետ կլինեմ, մի բան կմտածեմ, կստեղծեմ էրեխեքիս համար: Կինս էլ ահագին ուրախացավ: Հարազատները բոլորը զանգում են ուրախացած, ասում` ինչ լավ ա եղել»,- պատմում է Բոզոյանը, ով աժմ գործազուրկ է:
Նա նշում է, որ ընտանիքում այժմ միայն կինն է աշխատում՝ Մարինե Բոզոյանը, իսկ ընտանիքին սոցիալական օգնություն երբեմն բարեկամներն են հասցնում:
«Կինս 80 հազար է ստանում, «Գրանդ տոբակոյում» մաշինիստկա ա աշխատում: էդ գումարով սաղ ընտանիքով ապրում ենք: Դե, ինձ էս ցրտին հիմա աշխատել էլ չի կարելի, ֆիզիկական աշխատանք նույնիսկ տան մեջ չեմ կարող անել, իսկ հետո որ օրերը տաքանան, դրսի առևտուր կամ սվառկա կարամ անեմ, ընտանիքս կպահեմ էլի»,- ասում է 54-ամյա Բոզոյանը:
Հիշեցնենք, որ շուրջ երկու ամիս առաջ Բոզոյանը քաղցկեղի վիրահատություն էր տարել առողջական վիճակը վատթարանալուց հետո: Ստեղծված իրավիճակն ու սոցիալական ծանր կացությունը հնարավորություն չէին տվել նրան վիրահատության համար գումար տնտեսելու կամ պարտք անելու, և նրան այդ հարցում օգնել էին փուչիկների պայթյունից այրվածքներ ստացած երիտասարդները` 160 հազար դրամ հանգանակելով:
«Հիմա առողջական առումով նորմալ եմ ինձ զգում, բայց, դե, բուժում ա պետք, ստուգումների պիտի գնամ, դեղեր առնեմ, խմեմ, բայց, դե, գումար չունեմ, հո էրեխեքիցս չեմ կտրի, տանեմ ստուգվեմ»,- ասում է Բոզոյանը:
Նա նշում է, որ սպասում է հաշմանդամության կարգ ստանալուն, որպեսզի թոշակից էլ օգտվի ու կարողանա ընտանիքի ապրուստը հոգալ:
Լիլիթ Առաքելյան
© Medialab.am