«ՓիԱր-ի զարգացման հայկական կենտրոնի»` Հանրապետության հրապարակում «Ազգերի տոհմածառ» տեղադրելու նոր նախագիծ-առաջարկը, ըստ ճարտարապետ, քաղաքաշինարար Սարհատ Պետրոսյանի, «լրիվ Հյուսիսային պողոտային համարժեք «լուծում» է»։
«Այս գաղափարը ներկայացնողը ոչ միայն ճարտարապետությունից տեղյակ չէ, այլև առհասարակ համաչափությունից տեղյակ չէ,- «Մեդիալաբին» ասում Պետրոսյանը:-12 մետր բարձրությամբ ծառը Photoshop անելիս դարձել է մոտ 40 մետր։ Բայց, դե, ճարտարապետական խնդիրները մեր օրերում այնպիսի մակարդակով են կատարվում, որ յուրաքանչյուր անձ, ով սվաղ անել կամ Photoshop գիտի, դառնում է ճարտարապետ։ Լրիվ Հյուսիսային պողոտային համարժեք «լուծում» է»։
Տեղեկացնենք, որ այսօր «ՓիԱր-ի զարգացման հայկական կենտրոն» հանրային կապերի հասարակական կազմակերպությունը «Ֆեյսբուք» սոցիալական ցանցում առաջարկել է հրապարակում տեղադրել «Ազգերի տոհմածառ»: Տոհմածառը պետք է ցույց տա, որ «աշխարհի բոլոր ազգերը սերում են Հայաստանից և հայերից»:
«Դեռևս 2004 թվականին հայտարարվել էր մրցույթ, որի նպատակն էր լուծումներ գտնել Լենինի արձանի տեղում առաջացած բաց տարածության համար: Մրցույթի արդյունքում, սակայն, որևէ նախագիծ չհաղթեց: Ազգերի «տոհմածառ» ներկայացնող այս նկարը մեզ է հասել 1634 թվականին Լոնդոնում տպագրված Ավետարանից: Այս բացառիկ «տոհմածառում» Հայաստանը ներկայացված է որպես մարդկության բնօրրան: Ծառի հիմքում տապանն է, որը կանգնած է Մեծ Մասիսի գագաթին, վերջինիս վրա կա գրություն` Armenia և Ararat»,- նշված է կենտրոնի հայտարարության մեջ:
«ՓիԱր-ի զարգացման հայկական կենտրոնը» նաև տեղեկացնում է, որ մոտ «12 մետր բարձրությամբ ծառն իր տեսքով լիովին համապատասխանում է թամանյանական ոճին և ներդաշնակորեն լրացնում է այն»:
«Բացի ծառի խորհրդանշական մեծ նշանակությունից, այն նաև տուրիստական, գիտակրթական և մշակութային մեծ արժեք ունի: Ծառի հիմքում տեղակայված տապանն ունենալու է պատուհան-անցքեր, որոնցից ներս բոլոր ցանկացողները կարող են խորհրդանշական մետաղադրամներ գցել: Դա հանդիսանալու է յուրօրինակ «Ազգերի օգնության ֆոնդ», որում կուտակված գումարը ամեն տարի հատկացվելու է որևէ այլ ազգի` օգնություն ցուցաբերելու համար: Ծառի մոտ լինելու են հատուկ մետաղյա ցուցանակներ, որոնց վրա աշխարհի բոլոր հիմնական լեզուներով գրվելու է հակիրճ տեղեկատվություն ծառի և նրա նշանակության մասին: Նախագծի իրականացումը կապված չէ չափազանց մեծ ծախսերի հետ և կարող է իրականություն դառնալ ինչպես պետական միջոցներով, այնպես էլ հետաքրքրված անհատների կամ կազմակերպությունների ֆինանսավորմամբ»,- նշված է հայտարարության մեջ:
«Ազգերի տոհմածառի» նպատակներից և «ազգերին օգնելուց» զատ ճարտարապետությանն ու քաղաքաշինությանն անդրադառնալով` ճարտարապետ Պետրոսյանը նշում է, որ հրապարակի կենտրոնում նմանօրինակ կառույցի տեղադրումն անհամատեղելի է:
«Ակամայից մտածում եմ` ավելի լավ էր Լենինի արձանը թողնել կամ Նոյյան տապանը «Հաղթանակ» զբոսայգում կառուցել, որ նման հիվանդ գաղափարներ չառաջանան»,- ասում է Պետրոսյանը։
© Medialab.am
